Kuhlehlisiwe ukufunda eDUT ngenxa yesiteleka
ngo-8.5%, umhlomulo wezindlu wenyuke ngoR200 nebhonasi kaR9000.
Izinyunyana zimi ekutheni zingemukela u-8.25% wokunyuswa komholo, umhlomulo wezindlu kaR400 nebhonasi kaR7500.
“Inyuvesi ayikho esimeni sokuthi inyusele abasebenzi ngokwesiphakamiso sakamuva. Izinyunyana zifuna ukuthi udaba lwebhonasi lwenziwe lube yingxenye yezingxoxo zokunyusa umholo okwenza ukuthi izingxoxo zingayi phambili,” kusho uKhan.
UMnuz Milton Estrice okhulumela ikomiti elakhiwe yilezi zinyunyana uthe umqashi wenza ngamabomu ukuthi kube sengathi yibo abangafuni ukuthi isiteleka siphele.
“Ufuna ukusicindezela ukuthi sivume ukuthi lolu daba luze lulungiswe wumxazululi ozimele. Thina sithi lolu daba olwangaphakathi, kumele luxoxwe ngaphakathi. Sithi akubuyelwe etafuleni kuxoxwe ngendlela okuyiyo. Umqashi akangafiki ezingxoxweni esethi angidluli esigabeni esithile ngoba nathi sifika nesiphakamiso esiphuma kubasebenzi kodwa uma izingxoxo ziqhubeka silokhu sishintsha,” kusho yena
Umengameli wesigungu sabafundi, uSiphelele Ngubane uthe yisinyathelo esihle ukuthi kungaqalwa ukufunda ngoba abafundi abasabhalisile kule nyuvesi bangaphezulu kancane kukahhafu.
Uthe kulokhu kungqubuzana ngabafundi abasenkingeni.
“Abafundi okumele banikezwe izindawo zokuhlala abakangeni ezindaweni zokuhlala. Konke kuhamba kancane. Ngaphezu kwalokho uma kuthiwa akufundwe, ubani ozofundisa njengoba abafundisi besesitelekeni? Ngokubona kwethu kusekude ukuthi le nyuvesi ibe sesimeni sokuqala ukufundisa. Abaphathi nezinyunyana ababuyele etafuleni baqede udaba lweholo. Uma seluphothuliwe kuzocaca ukuthi lesi sikhungo siya ngakuphi,” kusho yena.