Iyaqonga eyokukhishwa kukaZuma
AMALUNGU e-ANC ahlela imashi ezoba namuhla ebizwa nge#ZumaMustGo athi uNobhala Jikelele wale nhlangano, uMnuz Ace Magashule kufanele aphume kulesi sikhundla ngoba asimfanele.
Umgqugquzeli we#ZumaMustGo, uBishop Max Maumela, izolo uthe uMagashule uyisiphoxi esingamhloniphi uMengameli we-ANC, uMnuz Cyril Ramaphosa.
“U-Ace akufanele abe nguNobhala Jikelele we-ANC kufanele aphume kulesi sikhundla,” kusho uMaumela.
Uthe uMagashule usaqhubeka nokuhlukanisa i-ANC njengoba ekhulume izinto ezivuna abathile emcimbini we-ANC obungempelasonto edlule.
Watshela i-ANC Youth League emcimbini wokugubha iminyaka engu-106 ukuthi uRamaphosa uneminyaka emihlanu kuphela yokuhola i-ANC. UMaumela uchaze uMagashule njengesigelekeqe esizobulala i-ANC.
Uphinde waveza ukuthi kunabaholi be-ANC okubalwa kubo ongqongqoshe abathile abahlela ukuketula uRamaphosa ukuze kungene uDkt Nkosazana Dlamini Zuma njengomengameli wesikhashana.
Kuzokuba nale mashi nje, izolo abaholi abaphezulu bebeyohlangana naye ukubhunga ngekusasa lakhe.
Izinkumbi zabalandeli be-ANC ezivela ezifundazweni eziyisithupha kulindeleke ukuthi zimashele eLuthuli House njengoba zifuna uZuma aphume esikhundleni sakhe.
UMaumela uthe balindele amabhasi angu-90 azoletha amalungu e-ANC azomasha eGauteng ehlangene nawe-SACP naweCosatu ukukhipha uZuma.
Izolo uthe amalungu abo ebegcwele emahhotela amathathu kanti aphuma e-Eastern Cape, Free State, Mpumalanga naseLimpopo.
“Uma engaphumi, sizomkhipha, sizomasha aze aphume esikhundleni,” kusho uMaumela osabise ngokumisa yonke into ezweni uma uZuma engehli esikhundleni.
UMnuz Gabriel Nkgweng, ilungu le-ANC eNorth West eliyingxenye ye#ZumaMustGo, uthe ngeke bavume ukuthi ubuholi be-ANC obuqokwe ngoDisemba budelelwe.
UNkgweng ubeyingxenywe yamalungu angu-40 e-ANC anqoba impi yokuthi kuqalwe kabusha ingqungquthela yaseBojanala eNorth West.
Uthe uRamaphosa ubuyisa ithemba kubantu nesithunzi se-ANC.
Abahleli be#ZumaMustGo baxwayise abantu abahlela amamashi okuvikela uZuma ukuthi bangabaphazamisi ngoba bazozivikela uma behlaselwa. UMkhulumeli weCosatu, uMnuz Sizwe Pamla, akazange atholakale ukuba aphawule izolo.
UMnuz Alex Mashilo, okhulumela iSACP, uthe abekho kumalungiselelo emashi ye#ZumaMustGo kodwa wathi kungenzeka amalungu abo aye kule mashi ngoba kusukela ngonyaka odlule bebethi uZuma makasule esikhundleni.
Uthe iSACP ifuna ukunika ubuholi obusha be-ANC isikhathi sokuxazulula ikusasa likaZuma.