UDe Lille ubekwe amacala enkohlakalo nokugwazisa
IDEMOCRATIC Alliance (DA) ibeke iMeya yaseCape Town, uNkk Patricia de Lille, amacala enkohlakalo nawokugwazisa.
UNkk de Lille ubhekene nevoti lokungathenjwa kobuholi bakhe eliphasiswe yiqembu lakhe. USihlalo weDA kuzwelonke, uMnuz James Selfe, uthe ukubekwa kukaNkk de Lille amacala kungenxa yokuthi usomabhizinisi waseGauteng ubhale isitatemende esifungelwe wasithumela kwiDA esola ilungu layo ngokumgwazisa. “Sithole isitatimende esifungelwe kusomabhizinisi waseGauteng esola iMeya yaseCape Town ngokumfuna intshontsho. Ngesikhathi sithola lesi sitatimende sitshele abameli beMeya ukuthi sizoyivulela amacala emaphoyiseni,” kusho uSelfe.
Uthe kusolakala ukuthi uNkk de Lille wafuna intshontsho lika-R5 million kusomabhizinisi waseVanderbijlpark ngo-2012.
Kuthiwa usomabhizinisi wayezothenga izigubhu zokucima umlilo emijondolo yaseCape Town.
UNkk de Lille uziphikile lezi zinsolo ebuza ukuthi kungani zivela manje?
“Ngiyaziphika futhi ngizikhahlela ngazo zombili izinyawo lezi zinsolo. Ukuvela kwazo manje kungishiya nemibuzo yokuthi kungani le ndoda u(Mnuz) Anthony Faul esenza isitatimende esifungelwe njengoba iDA isingibeka amanye amacala,” kusho uNkk de Lille.
Ubuze ukuthi kungani lo somabhizinisi engayanga emaphoyiseni kodwa waqala kwiDA futhi kungani elinde iminyaka emihlanu?
“Kubukeka sengathi eminye yeminyakazo yabantu abangazi ukuthi bangichithe kanjani, sebezama yonke into ukungcolisa igama lami,” kusho uNkk de Lille.
IDA isanda kuphakamisa ukuthi kuvotelwe ukungabethembi ubuholi bukaNkk de Lille yaphumelela ngamavoti awu-84 kwawu-59 kuMasipala waseCape Town.
Kulindeleke ukuthi kube nomhlangano womkhandlu oyisipesheli ozoba ngoFebhuwari 15 ozobe uphethwe nguSomlomo uMnuz Dirk Smit.
USelfe uthe uphenyo lwabo luzothikameza ukusebenza kweMeya.
“Njengoba iDA iphenya iMeya futhi isiyibeke amacala okungalandeli umthetho weqembu lokho kuzophazamisa ukusebenza kwayo. Uma usufaka namacala amasha, umsebenzi wayo uzophazamiseka,” kusho uSelfe. Uwaphikile amahlebezi okuthi iDA izofaka uMnuz Bonginkosi Madikizela esikhundleni sikaNkk de Lille wathi uma kuwukuthi abuthenjwa ubuholi beMeya kuzoba nokhetho lokukhetha iMeya entsha kaMasipala waseCape Town.