I-Prasa ichitha eyokutshala u-R1bn ebhange iVBS
I-PASSENGER Rail Agency South Africa (Prasa) iyiphikisile imibiko yokuthi ihlela ukutshala u-R1 billion ebhange elaboleka uMengameli Jacob Zuma imali yokukhokha isikweletu sika-R7.8 million somuzi wakhe waseNkandla.
Izolo, abakwaPrasa bathe abanazo izinhlelo zokukhokhela iVBS Bank imali ethile njengoba kubike amaphephandaba angeSonto.
“Sinama-akhawunti emabhange amakhulu aseNingizimu Afrika. Kuyenzeka sithole izicelo zokuthi sitshale imali emabhange futhi silandela umthetho ngaphambi kokuthi sitshale imali,” kusho abakwaPrasa.
Bathe imali etshalwa emabhange amahlanu amakhulu eNingizimu Afrika kusuke kuyimali esele kwisabelo mali sabo kanti isetshenziselwa ukuqhuba ezinye izinhlelo zentuthuko.
“Njengenkampani kahulumeni kufanele senze isiqiniseko sokuthi silandela imithetho yokuphathwa kwemali iPublic Finance Management Act (PFMA) neminye esiyibekelwe nguMnyango weziMali. Okwamanje siphezu kwezinhlelo zokubheka isicelo seVBS ngaphambi kokuthi sitshele aboMnyango weziMali ngesicelo sabo,” kusho abakwaPrasa esitatimendeni.
“Kufanele sikucacise ukuthi ayikho imali iPrasa eyikhokhele iVBS futhi awukho umnqamulajuqu osubekiwe wokuthi sizobe sesikhokhile ngosuku oluthize. Kuyishwa ukuthi kukhona ababhala ukuthi isikhulu esiphethe ezezimali kwaPrasa singaphansi kwengcindezi yokusayina amaphepha athinta iVBS,” kusho abakwaPrasa.
Bathe akukho okusayiniwe phakathi kwabo neVBS futhi akukho sibophezelo abasenzile kuleli bhange. -ANA