Sicela nisithandazise ukuze umhlangano esiya kuwona ube nokuthula: Mantashe
AMAPHAPHU abephezulu kwabaseNingizimu Afrika izolo njengoba ubuholi obuphezulu be-ANC bebuzohlangana noMengameli Jacob Zuma ukudingida ikusasa lakhe.
Izolo ntambama, uSihlalo we-ANC kuzwelonke, uMnuz Gwede Mantashe ucele abazalwane besonto lakhe, eKatlehong, eGauteng, ukuthi babakhulekele ukuze i-ANC yenze okulungele izwe ngoMengameli Zuma.
UMantashe ubesesontweni iSt John’s Apostolic Faith Mission lapho ecele umkhuleko ngaphambi kokuya emhlanganweni wesigungu esiphezulu se-ANC ebusuku.
“Asiyile ukuyohlambalaza uZuma noma ukumphatha kabi kodwa siyoxoxisana naye ngokulungele izwe, ngokulungele i-ANC nokulungele umnotho. Sicela nisithandazise ukuthi umhlangano wethu ube noxolo,” kusho uMantashe.
Ngesonto elidlule uMantashe utshele i-Independent Media ukuthi uZuma unezinhlelo ezintathu zokwehla esikhundleni, okokuqala ukuzehlela yena, okwesibili wukuthi ashaywe ngevoti lokungabethembi ubuholi bakhe bese okwesithathu kuba wukubekwa amacala yiPhalamende okuzoholela ekutheni agcine esephumile esikhundleni.
“Umsebenzi wethu akusikhona ukuphoxa abantu kodwa wukwenza okulungele bona. Selokhu kungene uRamaphosa iRandi liyasimama, kubuye ukwethenjwa kwe-ANC nosomabhizinisi bayalethemba izwe lethu,” kusho uMantashe.
USomlomo wePhalamende, uNksz Baleka Mbete, uthe ivoti lokungabethembi ubuholi bukaZuma lizoba ngoFebhuwari 22. Usho lokhu emuva kokuchitha isicelo seDA ne-EFF sokuthi kuhlehliswe ukwethulwa kwenkulumo kaMengameli ezoba ngoLwesine.
Kuphinde kwavela ukuthi ezinye izinhlangano zomphakathi okubalwa kuzo iFuture of SA zifuna uZuma ehambile njengoba zibhalele i-ANC.
KwiFuture of SA kukhona omakadebona be-ANC abafana noDkt Mavuso Msimang, Mnuz Dennis George weFederation of Unions of South Africa, Reverend Giet Khoza noMnuz Wayne Duvenage oyisikhulu esiphezulu se-Organisation Undoing Tax Abuse (OUTA).