Phansi novalo ngolomhlaba: Cele
ILUNGU lesigungu esiphezulu se-ANC, uMnuz Bheki Cele, linxusa ukuthi kwehliswe amaphaphu odabeni oseluphakamise imimoya mayelana nesiphakamiso sokuphuca umhlaba iSilo Samabandla uZwelithini.
Ekhuluma emcimbini obusenkundleni yezemidlalo eLakeside Sports Ground eVryheid ngoMgqibelo, lapho i-ANC kade igubha khona iminyaka engu-106 yasungulwa, uCele uthe i-ANC iyalulungisa lolu daba.
“Amakhosi amumemile obebhekele iKhomishini ebicubungula indaba yomhlaba weNgonyama Trust, lowo owayengumengameli, uMnuz Kgalema Motlanthe ukuba azowachazela ngalolu daba,” kusho uCele.
Uthe iSilo sakwedlulisela ukungenami kwaso ebuholini obuphezulu be-ANC ngesikhathi uMengameli uMnuz Cyril Ramaphosa wayezokwethula isigungu sakhe kusona KwaNongoma ngemuva kwengqungquthela ye-ANC ebiseNasrec, eGoli, nyakenye.
“Namaqembu aphikisayo awasixolele kancane ayeke ukuphapha ngalolu daba lomhlaba njengoba eselokhu ethi ayaseseka iSilo njengoba uhulumeni ehlela ukusiphuca umhlaba waso,” kusho uCele.
Unxuse amakhosi aseNdlunkulu ukuthi angavumi amabutho asetshenziswe ngosopolitiki ngenhloso yokufeza izinhloso zabo.
Uthe abantu asebexakwe yipolitiki abangasebenzisi amabutho.
UCele ukhuluma kanje ngemuva kukakhukhulelangoqo wemashi yamabutho avela ezindaweni ezahlukene eKZN eyayibheke eCity Hall eThekwini lapho afunga khona agomela ukuthi azomfela uMengameli Jacob Zuma kulabo abamgquzayo.
“Uyedwa umdidiyeli wamabutho, iSilo Samababandla kuphela. Asingaboni abantu uma sebeshaywa yizinto bazihlanganise namabutho,”kusho uCele.
Uveze nokuthi uneme ngokuba yilungu lesigungu esiphezulu esisha.
“Phambilini ngathi angineme ngokuba yilungu lesigungu esiphezulu, kwathiwa uma nginenkinga kungani ngingasuli. Manje kumele ngikuveze ukuthi ngijabule ngoba isigungu esikhona sihlelekile senza izinto ngesikhathi, hhayi ukuthi umhlangano ka-10 uqale ngo-12, kanti nemibuthano isiqala ngesikhathi esisuke sibekiwe. Nibonile nasemgubhweni weJanuwari 8, e-East London siqale ngesikhathi,” kusho uCele.