Bebelindele omakadebona esigungwini se-ANC
USHAYA amakhala ngokubunjwa kwesigungu sesikhashana esibhekele ukusebenza kwe-ANC KwaZuluNatal, i-Provincial Task Team (PTT), omunye wabafaka inhlangano enkantolo ngemuva kwengqungquthela yesifundazwe ka-2015.
Engxoxweni neSolezwe, eVryhedi ngoMgqibelo, uMnuz Lawrence Dube onguSihlalo wegatsha le-ANC, iBeyers Naude khona eVryheid uthe akaneme neze ngendlela okubunjwe ngayo iPTT.
“Mina bengilindele ukuthi mhlawumbe ubuholi obuphezulu buzofaka amalungu omakadebebona benhlangano kube yibona abakwiPTT hhayi indaba yokuthi kufakwe abantu abachemile,” kusho uDube.
Uthe uyaxakeka ukuthi uMnuz Sihle Zikalala uqokwe kanjani ekubeni nguMxhumanisi wePTT kodwa ebe ethinteka kulolu daba.
“Inkantolo yakubeka kwacaca ukuthi ubuholi boZikalala abukho emthethweni kodwa ubuholi obuphezulu uma sebakha isigungu sesikhashana bakhela phezu kwabo futhi yibona abaningi,” kusho uDube.
Uthe uyakwamukela ukuthi isigungu soZikalala siqome ukuthi sikuhoxise ukudlulisa icala.
“Yize ngingakatholi ngabameli bethu ngisazwe kwabezindaba ukuthi abasaqhubeki necala. Ngiyababongela ngoba bebesazophinde bamoshe imali njengoba neNkantolo yaseMgungundlovu yasho ukuthi iyabanika ilungelo lokudlulisa icala kodwa mancane amathuba okuthi baphumelele,” kusho uDube. Uthe banenkinga namaqabane akhuluma ngobumbano kodwa izenzo zibheke eceleni. “Ngiyafisa ukuthi i-ANC ibumbane esifundazweni ngoba uma ingabumbene iqembu lisengozini, ikakhulukazi njengoba kubhekwe okhethweni ngonyaka ozayo,” kusho uDube igatsha lakhe okuyilo ebelimeme uMnuz Bheki Cele ukuthi azoba yisikhulumi sosuku emcimbini wokugubha iminyaka engu-106, i-ANC yasungulwa. NoCele uthe kumele iqembu libumbane, ikakhulukazi eKZN. Wengeze ngokuthi nangesikhathi sengqungquthela yaseNasrec, eGoli, isifundazwe besiqhosha ngokuthi sinezithunywa eziningi kodwa sahluleka ukuba nomuntu osimele esigungwini esiphezulu samalungu ayisithupha ahola inhlangano.