Ugcine ebuyele ekhaya obeselala ethoyilethi
OWESILISA waseMzinto ubuyele emzini wakubo ayesewuphucwe wumashonisa obethi wahlala kuwo usungumhhume wabaphangi.
UMnuz Lala Nikili waseShayamoya eMzinto, obeselala ethoyilethi lalapho esebenza khona, uthe ubeselahle ithemba lokuthi uyogcina ebuyele ekhaya ngoba bese kuphele iminyaka ewu12 umakhelwane ongumashonisa enqaba ukuphuma kuwo.
Nakwamasipala ubesegqigqe waze wakhathala ephethe amaphepha akhombisa ukuthi uyindodana yomnikazi womuzi owashona.
UNikili uthe lo muzi wadliwa wumakhelwane ngesikhathi esejele phakathi kuka-1996 no-2005. Ngesikhathi eboshwa wayeshiye uyise owashona ngesikhathi eboshiwe.
UNikili ubuyele emzini wakubo ngoDisemba ngemuva kokuthi uMasipala waseMdoni uthe awusazi isivumelwano uNksz Caroline Goldstone athi wasisayina nawo sokuthi akhokhele ama-rates alo muzi bese ehlala kuwo.
Isolezwe libhale ngalolu daba nyakenye uNksz Goldstone ethi imvume yokuhlala kuwo wayithola kwamasipala.
UNkk Nonhlanhla Nombika, oyikhansela lendawo, uthe ngemuva kophenyo olwenziwe ngumasipala kuvele ukuthi asikho isivumelwano uNkk Goldstone asisayine nomasipala noma nabakwaNikili ngokugadwa komuzi.
“Ngokophenyo lwethu, uNksz Goldstone uwumakhelwane kodwa akahlobene noNikili. Asikho isivumelwano esibhalwe phansi ngokugada kwakhe lo muzi emiqingweni kamasipala. Ngokubona kwami wenza into enhle uma evikela umuzi kamakhelwane uma ewubona usuphenduke umhhume wabaphangi kodwa njengamanje selikhona ilungu lomndeni elithi lifuna ukubuyela ekhaya,” kusho yena.
UNkk Nombika uthe uphenyo belugxile ezivumelwaneni sokuhlalisana nobunikazi bomuzi.
UNikili uthe,“Ngibonga Isolezwe ngokungisiza ukube udaba lwami aluphumanga ephepheni bengingeke ngisizakale.”