Waqala ukuba nenkinga yesisu emuva kokuhlinzwa
USEDLA ngokuzikalela owesilisa waseMkhambathini, okhukhumalelwa yisisu asola ukuthi sidalwa wumthungo.
UMnuz Mboniseni Mabaso (26) waqala ukuba nenkinga ngonyaka odlule emuva kokuguliswa yi-Appendix. Uthe waguliswa yi-Appendix waya emtholampilo owamdlulisela esibhedlela eNorthdale, eMgungundlovu, ngoMashi 15. Kwadingeka ukuthi adluliselwe eGrey’s ukuze ayohlinzwa. Wangeniswa egunjini labagula kakhulu.
UMabaso uthe ukholwa wukuthi emuva kokuhlinzwa akathungwanga ngokuphelele ngoba amathumbu asala evele ngaphandle. Uze wadedelwa esibhedlela isimo sisenjalo. Esededelwa wayalelwa ukuthi ade eyohlanza isilonda ashintshe namabhandisi emtholampilo.
“Ngahlala izinyanga ezimbili ekhaya emuva kokudedelwa esibhedlela sengihlinziwe. Ngaze ngaphindela khona sengiyobika ukuthi angiboni ukuthi kuhamba kahle ngenxa yokuthi isisu sasivulekile,” kusho uMabaso.
UMabaso uyivezile incwadi eyabhalwa ngudokotela ngesikhathi ekhishwa esibhedlela ekuqinisekisayo ukuthi isisu besivulekile.
UMabaso uthe wabuyela esibhedlela ngo-Agasti eseyothungwa isisu wafike wasikwa ethangeni kupheshwa. Kusukela ngaleso sikhathi izicubu azibange zisabuyela esimeni. Usola ukuthi ukuhlinzwa sekome izicubu kwaba nomthelela enkingeni abhekene nayo.
Ukhala ngezinhlungu ezingapheli nesisu esesiphenduke ibhola.
“Uma ngidle kakhulu ngiyabuyisa nesisu sibe buhlungu. Sekuphoqa ukuthi ngidle kancane kancane futhi ukudla okuthambile. Uma ngike ngalamba kuba sengathi amathumbu ayagoqana,” kusho uMabaso.
Uthe udokotela wamenzela incwadi yokuthi ahole impesheni yokugula yezinyanga eziyisithupha, eyabuye yavaleka. Watshelwa ukuthi ngeke esakwazi ukusebenza ngenxa yesimo esasesimphendule inkubela.
Okhulumela uMnyango wezeMpilo KwaZulu-Natal, uNksz Ncumisa Mafunda, uthe IKHASI ELIKHOKHELWE: REGISTRATION 2018 yize bengavunyelwe ukuveza imininingwane ngesiguli kodwa bayabonga ukubikelwa yiphephandaba ngalolu daba.
“Umnyango usucele abaphathi besifunda eMgungundlovu nabaphenyi ukuthi balulandele udaba ukuze isiguli sibuyele esibhedlela sizohlolwa, siphinde selashwe,” kusho uNksz Mafunda.