Sihlomisa isizwe ngezinto ezimqoka ebuholini bomdabu
Ngisika elijikayo
ISAKHIWO sobukhosi sithathwa njengenye yezinsika zokubusa ezenza izwekazi i-Afrika lihlabahlose emehlweni omhlaba. Phela ama-Afrika ahlonishwa ngokuziqhayisa ngemvelaphi yawo nendlela yawo yokuphila. Lokhu kungenxa yeqhaza labaholi bomdabu, beholwa yiSilo, abahlala bevikela amasiko nendlela yethu yokuphila njengamaAfrika.
Njengoba izwe lingena esigabeni esaziwa nge-21st century, lapho yonke into yenziwa kusetshenziswa ubuchwepheshe bemishini, kubalulekile ukuthi nezinto ezingamagugu ethu zingasaleli emuva futhi izizukulwane ezizalwa ngalesi sigaba zifundiswe izinto ezibalulekile ngezakhiwo zomdabu.
Kule ngosi yanamuhla njengoMnyango wokuBusa ngokuBambisana neziNdaba zoMdabu, oholwa nguNgqongqoshe uNomusa Dube-Ncube, sifisa ukufundisa ngezihlokwana ezimbalwa ezithinta ubuholi bomdabu ngethemba lokuthi lokhu kuzoqeda imfundisoze ngesakhiwo sobuholi bomdabu.
Umbuzo: Kulandelwa miphi imigudu ukubheka izindlu ezifanele zobukhosi ikakhulukazi njengoba kwaziwa ukuthi ubukhosi obomndeni, hhayi kuphela inkosi esuke iphethe ngaleso sikhathi?
Impendulo: Kunomehluko phakathi komndeni wenkosi nendlu yobukhosi. Umndeni wobukhosi uhlanganisa izindlu zonke zamakhosi abusa kuleso sizwe. Indlu yobukhosi ihlanganisa inkosi, uNdlunkulu noma oNdlunkulu, abantwana nabazukulu.
Uma kubhekwa inkosi, izindlu ezinhlanu ezisondele ngokosiko lomndeni zikhomba inkosi, ezinye izindlu ziyabikelwa ngokwezigaba zazo osikweni.
Uyini umsebenzi womnyango uma kukhonjwa inkosi?
Umthetho ugunyaza umnyango ukuthi ube yinqolobane egcina izihlahla zomndeni. Umnyango uqashe ongoti nochwepheshe abafundele ezamasiko abenza umsebenzi wokuthi njalo ngonyaka bahlangane nemindeni yobukhosi ukuqinisekisa ukuthi amasiko nesihlahla somndeni kusemthethweni futhi isihlahla yileso umndeni osaziyo. Kubalulekile ukuthi umphakathi uqonde ukuthi iqhaza lomnyango ukuqinisekisa ukuthi okwenzekayo kusemthethweni futhi akuphambani nokushicilelwe emlandweni wobukhosi bezizwe. Umndeni okhomba inkosi.
Liyini iqhaza lebambabukhosi? Ngabe linamandla okukhomba izinduna?
Ibambabukhosi liphatha ngokusemthethweni iminyaka emithathu futhi linamandla okwenza umsebenzi wobukhosi kuhlanganisa nezindaba ezithinta izinduna. Njengoba kwenzeka uma kuyinkosi, nebamba bukhosi uma kunenduna okufanele ikhishwe esikhundleni ngesizathu esithize kufanele lilandele imigudu eshicilelwe emthethweni.
Iqhaza lehhovisi leNgonyama
INgonyama ingumvikeli wamasiko ethu. UMnyango usebenzisana nekomiti labantwana baseNdlunkulu kanti namakhosi ayakwazi ukuzikhulekela wona eSilweni uma kukhona afisa ukukudlulisa. Ukuze inkosi ibe ngesemthethweni futhi ingene ngokosiko, kufanele yenze nosiko lokuthela amanzi okusho ukuthi iyinkosi ekhonjwe yamukelwa naseNdlunkulu yobukhosi bakithi KwaZulu. Ukugcotshwa kwenkosi Inkosi ayigcotshwa uma ingayanga ukuyothela amanzi eSilweni. Uma kugcotshwa inkosi, iMbube ngokomsebenzi wayo isuke isizothula inkosi esizweni ngokosiko.
Uma kuzogcotshwa inkosi, abantwana baseNdlunkulu yibona abahola ukuhlangana nomndeni bephelezelwa ngumnyango. Uma kukhotheme inkosi liyini iqhaza lomnyango?
Uma kukhothama inkosi, uNgqongqoshe, iNhloko yoMnyango noma elinye lamaSekela ayo, bahola ithimba labasebenzi kuyohlanganwa nomndeni kukhaliswane nawo. Umnyango ulekelela umndeni ngezinsiza ukuze inkosi itshalwe ngesizotha kodwa zonke izinhlelo ziholwa ngumndeni ulandela amasiko awo. Umnyango ube usunikeza umndeni isikhathi sokuzila nokulila. Uma sekwedlule isikhathi sokuzila usihlalo womndeni uhlanganisa zonke izindlu kubizwe umnyango uzokwaziswa ukuthi umndeni usukulungele ukukhomba ozoba yinkosi ngokosiko. Umhlangano womndeni uphuma negama ngokuvumelana kwezindlu nokuthi emva kwalokho kuqinisekiswe ukuthi kuyahambisana nosiko nesihlahla somndeni esikwinqolobane yomlando. Imininingwane yomhlangano iyaqoshwa. Ngemuva kwalokho kwenziwa isethulo esigungwini sikahulumeni wesifundazwe kubikwa konke kuvezwe nobufakazi bomlando. Umthetho uyalela ukuba isigungu seKhabhinethi yesifundazwe siphasise ukuthi konke okumayelana nokukhonjwa kwenkosi kusemthethweni bese kudluliselwa kuNdunankulu ukuze akhiphe nencwadi esemthethweni ekhomba inkosi.
Ngizoma lapha okwanamuhla ngethembe ukuthi iphephandaba lethu lizophinda lisiphe ithuba lokufundisa abafundi ngezindaba ezibalulekile ezithinta ubuholi bomdabu.
Olobile nguLennox Mathatheni Mabaso
Inhloko yezokuXhumana eMnyangweni wezokuBusa ngokuBambisana neziNdaba zoMdabu