Usizwe wukubhala izingoma zothando owaliwa
UZIDUDUZE ngokubhala izingoma zothando umculi we-Afro Pop wakwaNyuswa, owaboshwa enengoduso aphume ejele isiqhubeke nempilo.
ULinda Hlengwa (33) ozibiza ngo-Anthony Lambogwini, ubhale izingoma athe ubezwakalisa ngazo ubuhlungu bokushiywa yisithandwa sakhe. Lo mculi, izingoma zakhe eseziqalile ukudlalwa emisakazweni yomphakathi, uthe ukubhala izingoma kumsizile ukuze angabambi amagqubu. Utshele Isolezwe ukuthi usakholelwa wukuthi lukhona uthando yize ephoxeke kakhulu ngokulahlekelwa yingoduso abeyithanda.
“Ngaboshwa ngo-2009 ngagwetshwa ngo-2010 ngenxa yecala lokushaya umqashi wami owayengibiza ngamagama okucwasa. Ngalawulwa wukucasuka ngagcina ngimshayile ngathatha nempahla yakhe kungafanele. Lokhu kwangenza ngalahlekelwa wumuntu engangimthanda kakhulu. Angimsoli ngokuthi aqhubeke nempilo ngoba ngangivele ngizohlala iminyaka eminingi ejele,” kuchaza uLinda.
ULinda, ophume ejele ngo-2016, uthe zonke izingoma uzibhale esejele kusukela ngo-2013. Bekuthi uma ezwa ekhumbule isithandwa sakhe abhale ingoma aziduduze ngayo. Njengamanje zingu-10 izingoma ezikwi-albhamu ethi The Best of Anthony Lambogwini. Ebuzwa ngalesi sihloko se-albhamu uthe wukuthi uyazi ukuthi iqukethe amanoni. Yize kuyialbhamu yokuqala lena kodwa kade aqala ukucula. Uthe wayevele ekhule ecula esontweni. Izingoma zakhe uqale ukuzibhala ngoba efuna ukubhodla ngobuhlungu bokwaliwa.
Yize kusenzima ukubuyela ngokugcwele empilweni abeyiphila, uthe uyakujabulela ukuthi umphakathi uyawuthanda umculo wakhe. Uthe uyamenywa emicimbini ikakhulukazi emishadweni ayocula khona. Uthe ejele ubencishekile amathuba ngoba emicimbini yakhona bekukhonya isicathamiya nendlamu.
ULinda useke wacula emcimbini obuhlelwe Ubizo The School of Art kwaNyuswa. Ufisa ukungena nasekulingiseni. Uthe ukhuthazwe abaculi abanjengoNtando, Ringo noVusi Nova.