UHunt nethemba lesicoco nokunyuka
UKUBALWA namaqembu abalekela izembe akumenzi umqeqeshi weBidvest Wits, uGavin Hunt, abone iqembu lakhe lingasafanelwe yizinto ezinhle kule sizini ka-2016/2017.
UHunt uthe iqembu lakhe uma lingaqeda isihlava sokungasebenzisi amathuba amagoli eliwakhayo lisenganyuka kwi-log ye-Absa Premiership liphinde linqobe nesicoco seNedbank Cup.
IWits ihleli endaweni ka-13 kwi-log ngemuva kokubambana ngo 1-1 neKaizer Chiefs emdlalweni weligi eBidvest Stadium ngoMgqibelo ebusuku.
IChiefs ihambe phambili ngegoli likaRyan Moon alishaye ngaphambi kokuthi kuyiwe ekhefini, kwathi uLehlohonolo Majoro wabeka elokulinganisa leWits ngesiwombe sesibili. I-Nedbank Cup, okuyisona isicoco somkhumulajezi esisele kule sizini, iqala ngoLwesithathu lapho iZitshudeni zizovakashelwa yiCape Town City kuyona le nkundla emdlalweni weLast 32. Umdlalo uqala ngo-7.30 ebusuku. Yize iWits itabalasa kwiligi kodwa uHunt nezakhe sebevele banaso isicoco kule sizini ngemuva kokunqoba iTelkom Knockout lapho beshaye khona iBloemfontein Celtic kowamanqamu, ePrincess Magogo Stadium ngo 1-0. Ngokunqoba lesi sicoco uHunt ulandele kuPitso Mosimane kubaqeqeshi bakuleli asebenqobe izicoco eziningi kwiPremier Soccer League. Ephawula kwithelevishini ngamaqembu asembangweni wesicoco uHunt, uthe: “Iqembu elizonqoba imidlalo eminingi yilona elizowina isicoco. Kulokhu umbango ushubile akufani nanyakenye lapho thina ngemuva kwemidlalo engu-20 bese siqoqe amaphuzu amaningi. Bonke abantu bayalwa nathi ngapha siyalwa lapha esikhona. Njengoba ngike ngasho singagcina sisondele phezulu. Kwazi bani mhlawumbe singayinqoba neNedbank Cup.”
Ephawula ngomdlalo weChiefs ubalise ngokungashayi amagoli.
“Yilokho okusibeke lapha esikhona njengamanje. Ngeke ngibasole abadlali bami ngokuzinikela enkundleni kodwa nje iyamangaza indlela esilahla ngayo amathuba,” kusho Hunt.
IWits kubagadli, ebophele uJames Keene, Amir Gamal (ongasadlaliswa), Gabadinho Mhango, isashaye amagoli angu-16 kuphela emidlalweni engu-20. Isanda kusayinisa uThobani Mncwango. Iyona nePlatinum Stars abanamagoli angu-10, abanesibalo esincane samagoli.