Singaba ngcono kakhulu kunesiyikho - Micho
AKAYINGENI eyokugxila esimeni se-log ye-Absa Premiership umqeqeshi we-Orlando Pirates, uMilutin “Micho” Sredojevic, ofuna baqhubeke nokulwela amaphuzu kuze kuphele isizini ka-2017/2018.
I-Pirates iqoqe amaphuzu amathathu ihlula iMaritzburg United ngo 2-1 emdlalweni wePremiership e-Orlando Stadium, eSoweto, ngoMgqibelo ebusuku. Lokhu kubuyisele eZimnyama embangweni wesicoco seligi kwazise zinyukele endaweni yesibili, zasala ngamaphuzu ayisihlanu kwiMamelodi Sundowns ezihola phambili ngawu-38.
Nakuba uSredojevic esekusho kaningi ukuthi ufuna ezakhe zidlale emqhudelwaneni weCAF ngonyaka ozayo kodwa uhlale ekugwema ukuthi sebekulungele lokho nokufaka ingcindezi kubadlali ukuze bambeke kulelo thuba.
I-Pirates ivuke yazicosha emuva kokugijinyiswa yi-Ajax Cape Town ngo 3-0 maphakathi nesonto eledlule.
“Angizikhathazi ngokuthi sikuphi kwi-log. Kumnandi ukubona ukuthi silaphaya kodwa asikubheki lokho. Sibheka ngokweqoqo lemidlalo, kusukela sinengu-15 kuya kwengu-20 esidlule kuyona. Sithole amaphuzu angu10, siphumelele kulokhu ebesizibekele khona. Eqoqweni lemidlalo eyisihlanu ezayo sibheke ukuqoqa amaphuzu amaningi. SineChippa, Chiefs, Golden Arrows neBloemfontein Celtic. Uma ubheka lokho, sigxile kakhulu emkhankasweni kunalapho sikhona. Ngosuku lokugcina lwesizini sizobheka
Lukuthi sisebenze kanjani. Sizosebenza kanzima. Kusifanele ukuba ngaphezulu kwalokhu,” kusho uSredojevic.
Nakuba uSredojevic esephumele obala ngokuthi useqala ukubona ukuthi ubheke kuphi nabafana bakhe kodwa emuva komdlalo uthe iPirates isekude ukufinyelela ezingeni alifunayo. Ukhale ngamaphuzu abaphunyulile endleleni, angabe awenzile umehluko.
“Sibe nesizini embi edlule. Bekufanele siqale indlela yokudlala ezovumelana nosiko lwePirates. Kumele sithole imiphumela ngokuthuthukisa leyo ndlela neqembu. Yebo singadlala kangcono kunalokhu kodwa abantu kufanele bazi ukuthi ebholeni uthatha amagxathu amabili abheke phambili, uthathe eliphindela emuva. Okubalulekile yinqubekela phambili,” kusho uSredojevic.
“Sesinyuse kakhulu izinga kodwa asikaneliseki. Sisafuna okungaphezulu. Kwesikwenzayo ayikho into eyenzeka ngokucindezela inkinobho.
Lapha kufanele uqhubeke nokwenza izinto ezibheke phambili. Kufanele senze izinto ezizosisa phambili, siyeke ukukhuluma. Kufanele siwine. Uzibeka wena embangweni, ngokuhlonipha amanye amaqembu kodwa senza ngakho konke ukubuyela ezingeni elisifanele. Ukuba izinto zihambe ngendlela ebesifisa ngayo, ngabe imidlalo eyisishiyagalolunye esiyidlale ngokulingana siyiwinile eyisikhombisa yayo. Ngabe sikhuluma okuhlukile manje, ngabe sizihambela sodwa,” kuphetha uSredojevic.