Umpetha womhlaba ubonga unina
KUVUKE izilonda ezindala kumpetha weWorld Boxing Organisation (WBO) bantamweight, uZolani “Last Born” Tete, eqokwa eba ngumshayisibhakela ovelele kumaSouth African Boxing Awards eBhayi, ngoLwesihlanu.
UTete wemuke neMale Boxer of The Year ehlula umpetha we-International Boxing Organisation (IBO) cruiserweight uKevin Lerena, Thulani “Tulz” Mbenge ophethe ibhande leSA welterweight no-Azinga “Golden Boy” Fuzile oshaya amaphiko kwi-SA Featherweight. Ngaphambi kokuthi uTete, okunguyena yedwa eMzansi ophethe ibhande lomhlaba ezinhlanganweni ezihlonishwayo emhlabeni, athole lo mklomelo omkhulu, ubevele esegixabezwe ngeSpecial Award nguNgqongqoshe weZemidlalo e-Eastern Cape, uPemmy Majodina.
UTete uthwale kanzima eminyakeni edlule esibhakeleni. Ngo-2015 ugcine ephoqekile ukulaxaza ibhande le-International Super Flyweight ngenxa yemali encane yokulivikela abeyithenjiswa ngophromotha.
Ngaphambi kokuthi akhulume emuva kokwemukela umklomelo weMale Boxer of The Year, ubize esiteji imenenja yakhe uMlandeli Tengimfene nophromotha u-Ayanda Matiti weXaba Promotions.
“Ngifisa ukubhekisa lo mklomelo kubazali bami abangikhulise bangifundisa inhlonipho, umfowethu uMakazole, imenenja yami nabaqeqeshi,” kusho uTete.
“Kukhona lapho bengifuna ukusiyeka khona isibhakela kodwa imenenja yami, uMlandeli Tengimfene no-Ayanda Matiti banginqanda bathi kunekhono abalibonayo kimina. Kusuka lapho sengiwine amabhande omhlaba amathathu. Ngifisa ukubabonga kusuka ekujuleni kwenhliziyo yami. Lo mklomelo ngiwuwinile nyakenye, ngisazowuwina futhi ngonyaka ozayo.”
Umklomelo obubhekwe kakhulu weFemale Boxer of The Year, ugoduke noBukiwe “Anaconda” Nonina ophethe ibhande le-World Boxing Federation Female bantamweight. Kade ewubanga noNoni Tenge noMapule Ngubane waseMgungundlovu othole oweFight of The Year. UTete uhlelelwa impi yokuvikela ibhande leWBO ezoba phesheya nembangi esazomenyezelwa. Ulivikele ngempumelelo nyakenye kuSiboniso Gonya. Nakuba uTete esekhale waze waba nesilokozane efuna ukulwela eNingizimu Afrika kodwa kubukeka kungeke kwenzeke kulo nyaka. UMajodina uthe abanayo imali yokuhlelela uTete impi eNingizimu Afrika.
Umklomelo weTrainer of The Year ugoduke noColin Nathan weHotbox Gym, kwathi oweManager of The Year watholwa nguTengimfene. IMatchmaker of The Year kube uLuyanda Kana wase-Eastern Cape. OwePromoter of The Year ugoduke noMatiti.