UDavids ukhale ngokupaka ibhasi kwePirates
UMQEQESHI weMaritzburg United, uFadlu Davids, usale ekhala ngokupaka ibhasi kweOrlando Pirates imxebula emdlalweni we-Absa Premiership e-Orlando Stadium ngoMgqibelo ebusuku.
I-Team of Choice, elinye lamaqembu asefomini kulezi zinsuku, ihlulwe yiPirates ngo 2-1 emdlalweni obukade ungenawo amathuba amaningi okushaya amagoli. I-Pirates iwezwe ngelibanzi nguThabiso Kutumela noHappy Jele. Igoli leMaritzburg lishaywe nguSiyanda Xulu esiwombeni sesibili.
Emuva komdlalo uDavids uthe abadlali bakhe basiphumelele isivivinyo.
“Ngihlala ngithi abadlali bebengekho enkundleni, namuhla basiphumelele isivivinyo. Akukho mayelana nemiphumela kodwa kungendlela esidlale ngayo nalokhu esizama ukukwakha lapha. Bekufanele sishintshe ukucabanga emuva kokungenelwa yigoli nasemizuzwini ewu-15 yokugcina kade besithelekela. Nasesiwombeni sesibili singenelwe yigoli, yebo siphoxekile kodwa abadlali bami badlale kahle,” kusho uDavids.
“Inhlonipho abasikhombise yona, bafake abadlali basemuva abayisithupha noma sekuzophela umdlalo baqhubeka nokufaka abanye ukuze basivimbe. Lokho akukaze kwenzeke kwiMaritzburg United, ifike e-Orlando Stadium sidlale ngale ndlela. Ngiyaziqhenya ngabafana. Esiwombeni sokuqala bashintshile badlala ngabadlali abayisihlanu emuva, akufani nokwethu okwabadlali abathathu emuva nababili abanyukayo ezinhlangothini. Bona badlale ngabadlali abayisihlanu emuva bezama ukusivimba. Basihloniphile ekubeni bedlalela ekhaya.”
Nakuba abaphathi beMaritzburg bezamile ukusichaza isizathu esenze badayisa umgadli u-Evans Rusike phakathi nesizini kodwa isikhala sakhe sigqamile. URusike, obehamba phambili ngamagoli kwiTeam of Choice, ushayele iqembu lakhe elisha, iSuperSport United, igoli ngesikhathi lihlula iBloemfontein Celtic ngo 4-2 ngoMgqibelo.
“U-Evans ungumdlali osezingeni. Ngesonto eledlule ngaphambi kokuthi adayiswe kade sibuka izibalo, hhayi ezamagoli, kodwa ezintweni ezibalulekile kithina. Phezulu uPercy Tau kulandele yena. Ungomunye wabagadli abahamba phambili kwiligi. Ngiyayibongela iSuperSport, ithole umdlali wangempela,” kusho uDavids.