UHamren uveza okumhehele eNingizimu Afrika
UKUSEBENZA nabadlali baseNingizimu Afrika phesheya kwezilwandle enye yezinto ezidobe obengumqeqeshi weqembu lesizwe laseBelgium, u-Erik Hamren, ukuthi aqoke ukuzosebenza eNingizimu Afrika.
UHamren umenyezelwe ekubeni yinhloko yabaqeqeshi beSundowns emasontweni edlule.
Uqeqeshe iqembu lesizwe laseSweden iminyaka eyisithupha. UHamren uthweswe ijoka lokuqinisa izinhlaka zokuthuthukisa abadlali enkulisa kodwa uzosiza naseqenjini elikhulu eliphekwa ngumqeqeshi uPitso Mosimane.
Ephawula ngokuficana nabadlali baseNingizimu Afrika phesheya uthe: “Lokho ngesinye sezizathu eziholele ekutheni ngize lapha. Ngesikhathi ngiqeqesha eDenmark ngawina iligi ngo-2008, nganginoSiyabonga Nomvethe iminyaka emibili, ngaba noBennedict Vilakazi izinyanga eziyisihlanu. Khona eDenmark ngahlangana nemenenja yabadlali, uMike Makaab, nendodana yayo okuyiyona eyaqala ukukhuluma nami ukuthi ngingathanda yini ukujoyina ikilabhu (Sundowns),” kusho uHamren. Mayelana nolwazi lwendlela yokucabanga yabadlali baseNingizimu Afrika, uHamren uthe: “Ngaphandle kokungabaza kufanele ngikufunde lokho ngoba akubona bonke abadlali abadlala eNingizimu Afrika abawelela e-Europe. Labo abaya e-Europe kufanele bashintshe ngoba sekungelinye isiko. Ngibheke ukufunda konke lapha eNingizimu Afrika ngebhola ne-Afrika yonkana.”
UPatrice Motsepe, umengameli weSundowns, ukuqinisekisile ukuthi uHamren akezile ukuzothatha umsebenzi kaMosimane. “Baningi abaqeqeshi esikhulume nabo kodwa bekufanele sithole umuntu ongenazo izinhloso zokuba ngumqeqeshi weqembu. KwiSundowns sinosiko lokuthi uma kuhamba umqeqeshi kuhamba nethimba lakhe. Eminyakeni edlule sibhekane nenkinga yokuba nephini lomqeqeshi ebelikade lingamsizi ngalutho umqeqeshi ngoba lifuna ahluleke ukuze lizothatha umsebenzi,” kusho uMotsepe.