OkwamaProteas sekudinga imikhuleko
USIZI luzwa olunye eqenjini lemidlalo yosuku olulodwa laseNingizimu Afrika amaProteas.
Iqembu liqale ukudlala imidlalo yosuku olulodwa eThekwini ngesonto eledlule lapho lithelwe khona othulini yi-India eKingsmead Stadium. Kulowo umdlalo kulimale ukaputeni uFaf du Plessis othinteke umunwe. UDu Plessis udlale kahle kakhulu kulo mdlalo wokuqala eshaya ama-run angu-120 yize begcine behluliwe.
AmaProteas abeye kulo mdlalo wokuqala engekho u-AB De Villiers naye othinteke umunwe kwiTest yokugcina. Emdlalweni wesibili kucacile ukuthi bebengekho oDu Plessis noDe Villiers njengoba amaProteas ethelwe ngehlazo lamawikhethi ayisishiyagalolunye, eSuperSport Park, eCenturion. Lokhu kwenze i-India yahamba phambili ngo 2-0 ochungechungeni lwemidlalo eyisithupha.
Ukushaywa kabuhlungu eSuperSport Park kuhambisane nokulimala kukaQuinton de Kock okuvele ukuthi ulimele esihlakaleni futhi ngeke esayidlala yonke imidlalo yosuku olulodwa neyeT20 ne-India.
Kusasa amaProteas azobhekana ne-India emdlalweni wesithathu wosuku olulolwa eNewlands Stadium, eKapa, ngo-2 ntambama. Lo mdlalo kumele nakanjani amaProteas awuwine ukuze azibeke ethubeni lokuwina lolu chungechunge lwemidlalo.
“UQuinton ulimale esihlakaleni kwesobunxele ngesikhathi ebhetha emdlalweni wosuku olulodwa wesibili ngeSonto wezwa izinhlungu ezimangalisayo,” kusho imenenja yeqembu uMohammed Moosajee esitatimendeni esithunyelwe yiCricket South Africa (CSA)
“Lolu hlobo lokulimala luzodinga ahlale amasonto amabili kuya kwamane ukuze alulame ngokugcwele, okuchaza ukuthi ngeke esayidlala imidlalo yosuku olulodwa neyeT20 ne-India.”
Esikwatini samaProteas vele kukhona uHeinrich Klassen ongakaze adlale nokwaziyo ukuba yi-wicketkeeper.
UDu Plessis (olimele umunwe), Dale Steyn (olimele iqakala) noDe Kock kubhekwe ukuthi bazame ukwelulama ngaphambi kokuthi amaProteas adlale imidlalo yamaTest ne-Australia ngoMashi 1. UDe Villiers angase abe khona emdlalweni wosuku olulodwa ne-India eWanderers Stadium, eGoli, ngoMgqibelo.