Bakushayele ihlombe ukuhlehliswa kweSona
AMAQEMBU aphikisayo asamukele ngo-elethu isinqumo sikaSomlomo wePhalamende likazwelonke, uNksz Baleka Mbete, sokuhlehlisa inkulumo kamengameli ebhekiswe esizweni, iState Of The Nation Address (Sona), ebizoba kusasa.
USotshwebhu weDA ePhalamende, uMnuz John Steenhuisen, uthe bajabule ngokuthi iPhalamende lithathe isinqumo sokuthi liyihlehlise iSona.
“Ukuhlehliswa kweSona yilokhu obekufiswa yiDA namaqembu aphikisayo abelokhu elwa ethi uMengameli Jacob Zuma akakufanele ukuthula le nkulumo,” kusho uSteenhuisen.
Uthe uyathemba nokuthi abantu baseNingizimu Afrika bazojabula ngokuhlehla kweSona ngoba ngeke besawalalela amanga kaZuma. UMgcinimafa-jikelele we-IFP, uMnuz Narend Singh, uthe ukuhlehliswa kweSona kuzobuyisa isithunzi sePhalamende ebeseliphenduke ihlaya selilahlekelwe ngisho ukwethenjwa. UNobhala-jikelele we-EFF, uMnuz Godrich Gardee, uthe bebelokhu besho bethi uZuma akakufanele ukwethula iSona. UGardee uthe i-EFF ibifuna ukuthi uZuma ehle esikhundleni, uma engehli akhishwe ngevoti. UMnuz Willie Madisha weCope uthe nabo bayakwamukela ukuhlehliswa kweSona, wathi uyathemba ukuthi i-ANC izothuma omunye umuntu hhayi uZuma ukuthi kube nguyena owethula inkulumo. Kanjalo noSotswebhu we-ANC, uMnuz Jackson Mthembu, naye uthe bayakwamukela ukuhlehliswa kweSona njengoba kumemezele uNksz Mbete.
“I-ANC izolinda umphumela wesigungu esiphezulu seqembu, iNational Executive Committee (NEC) ozoba kusasa (namhlanje) ozonika umhlahlandlela kwikhokhasi ye-ANC,” kusho uMthembu.
INhloko yezokuXhumana kwiNFP, uMnuz Sabelo Sigudu, ithe isinqumo sokuhlehlisa iSona sikhombisa ukuthi amaqembu aphikisayo aseyalalelwa.
“INFP ineme ngalesi sinqumo ngoba sekuzoba nesikhathi esanele sokukhipha uZuma esikhundleni sakhe,” kusho uSigudu.
UMnuz Nqabayomzi Kwankwa we-UDM uthe nabo bayasamukela isinqumo sokuhlehliswa kweSona, wathi abangabazi ukuthi uZuma uyahamba.
“Ngibona ukuthi bafuna ukumnika isikhathi sokuthi ehle esikhundleni,” kusho uKwankwa.