Bazitapele igilosa emzini wobaqolile
BAZITAPELE izimpahla negilosa emzini kamakhelwane wabo abantu baseChesterville abebemsola ngokubakhokhisa imali abethi eyokugwazela umsebenzi wakwaMasipala weTheku.
Izolo, labo makhelwane abebegane unwabu bathe umakhelwane wabo uNkk Cabangile Cele-Zikhali, ubebathembise ukuthi bazoqala emsebenzini ngoMsombuluko. Kuthe sekumele baqale wathi abaye emahhovisi ophiko oluqoqa intela kuleli iSouth African Revenue Service (Sars) bayofuna izinombolo zokukhokha intela.
UNksz Nomvula Nyathikazi uthe uNkk Cele-Zikhali oke wasebenza ohlelweni obelwaziwa ngeCato Manor Greening, ubethi uqashwe umasipala ophikweni lwamanzi ngemuva kokuphela kwalolu hlelo ngoDisemba.
“Uthe ube nenhlanhla waqashwa wuphiko lwamanzi, nathi asisolanga lutho ngoba ubethi uqale ngoJanuwari. Uthe kulolu phiko kunowesifazane abembiza ngokuthi uLulu, okunguyena onikezwa le mali ayiqoqayo. Ubethi uma sebeqashiwe laba bantu nguyena ozoba yimenenja yabo kodwa uzobe esebenza ngaphansi kukaLulu,” kusho yena.
Kuvele ukuthi bangu-36 abathi baluthwe nguNkk CeleZikhali kanti umuntu ngamunye ubegwaza ngoR2 000. Iningi labo le mali liyiboleke komashonisa ngoba lithembe ukuthi seliwuthole umsebenzi.
UNksz Siziphiwe Mfeka uthe ubeyitoho lapho esebenza khona, wesule emsebenzini wakhe ngoLwesine ngoba etshelwe ukuthi uzohola uR9 000 kwamasipala.
“Lo mama ungibulele, ngangihamba naye engiqhuba ethi angesule emsebenzini ngoba sizoqala ngoMsombuluko emsebenzini. NgoMsombuluko sivukele kwaSars njengoba kade eshilo, sihlale khona kwaze kwavalwa elokhu ethi asimlinde uyeza uyolanda imifaniswano yethu. Kulapho sibone khona ukuthi sengathi siqoliwe sabuya seza la emzini wakhe. Ingane yakhe isitshele ukuthi ubekhona ufike wathatha isikhwama wahamba. Simthumelele imiyalezo simtshela ukuthi sizothatha izimpahla emzini wakhe, sizozibuyisa uma eselethe imali yethu,” kusho yena.
Kuthiwa uNkk Cele-Zikhali uthumele imiyalezo kubagilwa ethi abalande imali yabo ngo-9 ekuseni, izolo. Abanye ubebasabisa ngokuthi uzobathakatha uma bengayeki ukumthuka. Sebefikile uthe le mali ayikho kuye kodwa ikulo wesifazane okuthiwa uLulu. Ingxenye yaleli qulu ihambe naye yaya ophikweni lwamanzi kumasipala lapho kade ethi lo wesifazane usebenza khona, kwalandulwa kwathiwa akekho umuntu onalelo gama.
Ngemuva kwaloku ushintshile wathi kunoR40 000 awubekile komunye umuzi eGlenmore. Kuthe kusalungiselelwa ukuya khona washintsha wathi ucela kubizwe amaphoyisa aboshwe.
Ebuzwa yileli phephandaba mayelana nalezi zinsolo, uNkk Cele-Zikhali uthe: “Ngicela nike ningiyeke kancane.”
Emva kwalokho uhambile wayongena ekamelweni. Kube khona abamlandelayo bamphuca amaphilisi okuthiwa uke wazama ukuwaphuza.
Uthe abathathe izimpahla zakhe bazidayise ngoba ayikho imali. Kulamule ukufika kwamaphoyisa umphakathi usho ukumqeda.
Umyeni wakhe uMnuz Sanele Zikhali uthe ubazi ukuthi unkosikazi wakhe usebenza kwadokotela.
“Ebengikuqaphela ukuthi bese sidla ukudla esingajwayele ukukudla layikhaya. Ngithe uma ngimbuza ubebhoka ngolaka abukise ngami kubangani bakhe ebengihlale ngibafica la ekhaya bephuza. Ngigcine ngizitshela ukuthi kusho ukuthi uwinile e-casino ngoba ungumuntu okhonze ukugembula kodwa akafuni ukungitshela. Ngishayelwe ucingo sengitshelwa ukuthi umuzi wami usengcupheni yokusha. Namhlanje, asinakudla abantu bathathe ngisho igilosa, asinalutho. Uma ngimbuza ngalokhu, akangiphenduli,” kusho yena.
ULt Colonel Thulani Zwane, okhulumela amaphoyisa, uthe alikho icala elivuliwe ngalesi sigameko.
UNksz Tozi Mthethwa, okhulumela uMasipala weTheku, uthe abathi baqoliwe kufanele bavule amacala emaphoyiseni noma bathinte uphiko lwakwamasipala oluphenya ngenkohlakalo iCity Investigation Unit.
“Awukho umsebenzi okhokhelwa imali kwamasipala, uma kunomuntu othi udayisa imisebenzi, umphakathi awumbike kulolu phiko,” usho kanje.