Ulimele kanzima unogada enqanda izigebengu
USESIMENI esibucayi unogada obezama ukunqanda izigebengu zibamba inkunzi esitolo sokudla eThekwini, izolo.
Kuphazamiseke ukusebenza kwaDebonairs osemgwaqweni uYusuf Dadoo enkabeni yedolobha ngesikhathi kugasela amadoda angaziwa, ashaqa imali adubula unogada.
Lo nogada igama lakhe eligodliwe udutshulwe ekhanda nasesifubeni ngesikhathi ezama ukunqanda izigebengu ebezihlomile.
Isolezwe lithole ukuthi ngo-11 ekuseni abasolwa ababili bafike kulesi sitolo bazenza abantu abazothenga i-pizza. Kuthiwe bafune ngodli imali kubasebenzi, banikezwa imali.
Isolezwe lithole ukuthi baphumelele ukuthola imali elinganiselwa kuR2 000 kuphela.
Unogada kuthiwa uvale isicabha ngesikhathi abasolwa besesesitolo. Unogada kuthiwa usebenzise i-pepper spray ukufutha ebusweni abasolwa nokuyilapho bemdubule khona ekhanda nasesifubeni.
Abasolwa kuthiwa baphihlize isicabha baphuma babaleka.
Iphoyisa ekade lizihambela ngakule ndawo kuthiwa lizamile ukujaha abasolwa ngemoto yalo kodwa babaleka ngezinyawo. Kubizwe abezimo eziphuthumayo, unogada uyiswe esibhedlela isimo sibucayi.
Okhulumela amaphoyisa KwaZulu-Natal uLt. Colonel Thulani Zwane uthe bavule icala lokuzama ukubulala nelokubamba inkunzi. Unxuse ukuba abanolwazi ngabasolwa bababikele.
Isolezwe ngesikhathi lifika kule ndawo bekugcwele iqulu labantu libukela.
Omunye wabadayisi basemgwaqweni ocele kugodlwe igama lakhe uthe ushaqekile esezwa kuqhuma isibhamu. “Ngithukile sengizwa kuqhuma isibhamu, ngibone abasolwa ababili sebephuma bebaleka. Kuphazamiseke ukusebenza kwethu kule ndawo ngoba amaphoyisa afike ayivala ukuze ezokwazi ukusebenza esitolo.”
Isolezwe alikwazanga ukukhuluma nabasesitolo ngenxa yokuvaleka kwale ndawo okwenzeke kuyo isigameko. Nabaphenyi bebesabaphosa ngemibuzo abasebenzi.