Zisabisa ngokukuphinda lokho izitshudeni
ZISABISA ngokuphinda zivale umgwaqo kusasa izitshudeni zase-University of South Africa (UNISA), eThekwini uma zingayitholi incazelo ecacile mayelana nokuxhaswa kwazo yisikhwama sezimali iNational Students’ Financial Aid Scheme, iNSFAS.
Lezi zitshudeni zikusho lokhu ngesikhathi zizokweseka ozakwabo oSamukelisiwe Ndlovu, Nompumelelo Nduli noMlekeleli Shandu abebevele enkantolo yeMantshi eThekwini izolo ngecala lokususa udlame emphakathini.
Izitshudeni ziphume ngebheyili kaR500 umuntu emunye.
UXolo Magutshwe, uMengameli weSASCO kule nyuvesi uthe ukuboshwa kwalazi zitshudeni kungenye yezindlela zamaphoyisa zokubasabisa ukuthi zingaqhubeki nokulwela imfundo yamahhala ezithenjisiwe.
Omunye wezitshudeni ongathandanga ukudalulwa, obeyingxenye yabebezokweseka ababoshiwe uthe: “Amaphoyisa ehluleka izigebengu zigwaze isitshudeni amanxeba awu-10. Lesi sitshudeni sisesimeni esibucayi esibhedlela. Azobopha abantu abalwela imfundo? Ngeke siyeke ukulwela ilungelo lethu lokufunda, uma izikhulu zakwaNSFAS zingacacisi ukuthi sizokhokhelwa nini. Sizovala umgwaqo omkhulu eThekwini uWest Street (Dkt Pixley kaSeme). Sifuna imfundo yamahhala esithenjiswe yona. Njengamanje asibhalisiwe silinde wona uNSFAS esingazi ukuthi kungani ungasikhokheli.
Izitshudeni ziboshwe ngoLwesibili ngesikhathi zibhikishela ukuthi lesi sikhwama asikhokhile okwenza ukuthi zingabhaliswa.
Lesi sikhungo sivaliwe, sizovulwa kusasa njengoba kuzoba nomhlangano nezikhulu zakwaNSFAS nezitshudeni, ozocacisa ngokukhokhelwa kwazo.
IMantshi elingatholakalanga igama layo ithe akwamukelekile ukuthi uma izitshudeni zinezikhalo ngento ethile bese zivala imigwaqo.
“Ukulwa nabantu bomthetho kuyicala elibi futhi izehlakalo ezinjengalesi sezivamisile. Ngenxa yalokhu ngizonishaya ngoswazi oluncane ngebheyili kaR500.”