AbaseMpumalanga bamashele esiteshini samaphoyisa
ABANTU baseMpumalanga ngaseHammarsdale bamashele esiteshini samaphoyisa izolo befuna ukucaciselwa ngokuboshwa kosolwa ngokubulala intombazane (18) ebisinyamalale isonto.
Kuthiwa indoda iboshwe ngoMsombuluko emuva kokutholakala neselula kaNoluthando Sifolo obefunda uGrade 10 eLuthayi High, isidumbu sakhe esatholakala sesonakele emuva kwesonto enyamalele. UNoluthando ungcwatshwe ngempelasonto edlule emuva kokunyamalala ngoJanuwari 23.
Ilungu lomndeni ebelikade lihlanganyele emashini izolo, uMnuz Mdu Ndlovu, uthe namanje abasazi isizathu sokubulawa kukaNoluthando. Umphakathi uye esiteshini samaphoyisa ngoba ucasulwe ukuzwa ukuthi indoda iboshelwe ukulimaza iselula ekubeni kumele iboshelwe ukubulala.
“Ngiyile emashini ngoba umphakathi ubufuna sizozizwela izikhalo zawo. Kuphume umphathisiteshi wachaza ukuthi uphenyo luyaqhubeka, konke kuzocaca enkantolo,” kusho uNdlovu.
Uthe umufi wayelele kubo ngesikhathi eshayelwa ucingo ngumngami wakhe wesifazane, aphuma waya kuyena. Kuthiwa waphuma ebhince ithawula, eshuqule neduku. Wanyamalala kusukela ngalelo langa kanti nomngani wesifazane akaziwa. Uthe kusolwa ukuthi umngani uyathandana nendoda eboshiwe.
“Kwaphela isonto enyamalele uNoluthando simfuna. Isidumbu sakhe satholakala ezingadini eduze kwesinye isikole ngasekhaya. Bese sonakale kangangoba umndeni wakhe kuphela obuzokwazi ukusikhomba. Ithawula ayelibhincile bese kugoqwe ngalo ikhanda lakhe. Sisola ukuthi waqala wadlwengulwa ngoba bezingekho izimpahla zangaphansi.”
Uthe indoda yesibili okuthiwa yachikidwa ngoboshwe kuqala iboshwe izolo. Umndeni kaNoluthando uthe bayaziwa ababoshiwe endaweni kodwa abaziwa njengezigebengu. Kuthiwa oboshwe kuqala ubedume ngokudlala ibhola khona eHammarsdale. Kusolwa ukuthi umngani onyamalele unolwazi ngokushona kukaNoluthando.
Umndeni uthe umufi ubebazi ababoshiwe kodwa bekungekho budlelwano phakathi kwakhe nabo futhi ubungazi lutho ngengxabano.
Okhulumela amaphoyisa KwaZuluNatal, uColonel Thembeka Mbele, uthe kuboshwe abasolwa ababili abaneminyaka ewu-21 no-24. Uthe abasolwa babhekene necala lokutholakala nempahla eyebiwe nelokubulala.
“Umsolwa oneminyaka ewu-21 uvele enkantolo namuhla (izolo), icala lahlehliselwa uMsombuluko. Omunye umsolwa uzovela enkantolo kusasa (namuhla) ngecala lokubulala,” kusho uColonel Mbele.