Uvalo kunqunywa umfundi eDumbe
UTHUKA izanya umphakathi waseBilanyoni, eDumbe kulandela ukunqunyiswa okwembuzi komfundi oneminyaka engu-22 washiywa emhosheni.
Lo wesifazane ongakadalulwa igama lakhe ubulewe ngezintatha ngeSonto ngabantu abangaziwa. Umufi ubefunda uGrade 12 eKanyekanye High khona eDumbe.
Kuvele ukuthi lo wesifazane obulewe, ulandela abanye abantu abaningi asebebulewe endaweni.
Umphakathi kuthiwa ususaba nokuzihambela ukhululeke emgwaqweni ngenxa yalesi simo sokubulawa kwabantu, abanye bebanjwa inkunzi emini kabha.
Isolezwe lithinte uMnuz Xolani “Slomo” Ngwenya ohlala kule ndawo nokuqinisekisile ukuthi isimo asisihle ngenxa yokubulawa kwabantu nobugebengu.
“Asisakwazi ukuzihambela emgwaqweni uma sekushaye u-6 ebusuku ngenxa yokusaba ukuthi singahlaselwa. Baningi kakhulu abantu ababulewe ngesihluku kule ndawo. Izingane azisathunywa nasesitolo ngenxa yokusaba ukuthi zingabulawa. Sinenkinga enkulu yobugebengu nesingazi ukuthi sizoyinqanda kanjani,” kusho uNgwenya.
Okhulumela amaphoyisa KwaZulu-Natal uLt Colonel Thulani Zwane ukuqinisekisile ukubulawa kwalo mfundi.
“Amaphoyisa asePaulpietersburg aphenya icala lokubulala kulandela ukutholakala kwesidumbu sowesifazane oneminyaka engu-22 otholwe enenxeba entanyeni. Imbangela yokubulawa kwakhe ayaziwa.”
Usomabhizinisi wendawo uMnuz Sboniso “MKF” Simelane uthe bathwele kanzima ngenxa yabo ubugebengu endaweni.
“Inkinga enkulu esinayo ukungabonakali kwamaphoyisa endaweni. Isiteshi samaphoyisa esisebenzisayo kumele uhambe imizuzu engu-30 uma uya kuso ukuze uthole usizo. Inqwaba yabantu babulawa singezwa lutho ngecala,” kusho uSimelane.
Imizamo yokuthola ikhansela lakule ndawo ayizange iphumelele izolo njengoba ucingo lalo belukhala lungabanjwa.
Umndeni kamufi nawo awuzange utholakale izolo kwaze kwashaya isikhathi sokushicilela.
Isolezwe lithole ukuthi bekukhona isiteshi esisebenzela umphakathi endaweni, sinephoyisa elilodwa elihamba ngezinyawo. Bathe lesi siteshi esingumahamba nendlwana kunesikhathi singasebenzi. Amaphoyisa awazange akuqinisekise okushiwo umphakathi ngalesi siteshi.