I-DA nomkhankaso wokuheha intsha
UMHOLI weDA KwaZulu-Natal uMnuz Zwakele Mncwango uthi iqembu labo lizimisele ngokuheha intsha njengoba lisemkhankasweni wokwehlisa amandla kaKhongolose abe ngaphansi kuka-50%, okhethweni lukazwelonke ngonyaka ozayo.
Esithangamini nabezindaba eThekwini izolo, uMncwango uthe sebejube uNksz Mbali Ntuli ukuthi kube nguyena iNhloko yezemikhankaso eqenjini ngenhloso yokufeza iphupho labo lokudonsa ivoti labantu abasha.
“Iqiniso lithi iningi lentsha lintula amathuba emisebenzi futhi abantu abasha abavoti ngokuthi obani ababesemzabalazweni, bavota ngokuthi ubathembisani,” kusho uMncwango.
Uthe bayathemba ukuthi uNksz Ntuli uzowenza ngempumelelo umsebeni wakhe.
“UNksz Ntuli ungumholi owaziwayo oseke waba yikhansela waphinde wahola intsha yeqembu, ukubeka yena kulesi sikhundla sokuhola imikhankaso kuzoyisiza kakhulu inhlangano,” kusho uMncwango.
UNksz Ntuli obeyilungu lesiShayamthetho KwaZulu-Natal wesulile khona njengoba esenikwe lo msebenzi omusha.
Kumanje iqembu limatasa nohlelo lokuvala isikhala sakhe.
UMncwango uthe basazobona ukuthi isikhala sikaNksz Ntuli basivala ngobani.
UMncwango akazange afune ukuphumela obala ukuthi uzoya yini esiShayamthetho njengoba kulindelekile kulandela ukuthi uphinde wakhethwe kabusha njengomholi wenhlangano esifundazweni.
“Uma unguSihlalo weqembu esifundazweni, lokho kukwenza ukuthi kube nguwena ophambili ohlwini lwamagama, kulele kumina ukuthi nginqume ukuthi ngiyaya yini esiShayamthetho noma ngiqhubeka nokuhlala eThekwini kodwa isinqumo engizosithatha sizobe sincike ekutheni ikuphi okuzosiza inhlangano,” kusho uMncwango.
Uthe ngemuva kwengqungquthela ka-2015, unqume ukuthi angayi esiShayamthetho ngoba kade efuna ukulungisa isimo saseThekwini aphinde akhulise neqembu khona. “Ngicabanga ukuthi ngikwazile ukukhulisa iqembu eThekwini ngaphinde ngakwazi ukudala uzinzo enhlanganweni eThekwini nakwisifundazwe, uma kwenzeka ngihamba eThekwini anginalo uvalo ngabaholi engingabashiya khona,” kusho uMncwango. Uthe njengoba kubhekwe okhethweni ngonyaka ozayo bazophinde bagxile nakubafundi basemanyuvesi ngenhloso yokunxenxa amavoti abo. “Sifuna ukunxenxa amavolontiya amaningi avela emphakathini ehlukene, emakhaya
nasemadolobheni,” kusho uMncwango.
Uthe sebesungule umkhankaso weVukuzakhe ngenhloso yokusiza intsha entula imisebenzi.
“Siphezu komkhankaso iSakh’ingomso ozogxila ezikhungweni zemfundo ephakeme ozobe ubhekelele ngqo ukusiza abafundi ezinkingeni zabo ozoba uholwa inhlangano yethu yabafundi iDemocratic Alliance Student Organisation (Daso),” kusho uMncwango.
UNksz Ntuli uthe uzizwa ethobekile ngokuthenjwa iqembu ukuthi limnike umsebenzi obaluleke kangaka wokuhola imikhankaso yeqembu.
“Ngizimisele ngokuthi lo msebenzi ngiwenze ngempumelelo ukuze ngingabaphoxi abaholi bami,” kusho uNksz Ntuli.