Kusimame iRandi kuhlehla iSona
IRANDI lisimeme izolo emuva kokumenyezelwa kokuthi iyahlehla inkulumo yesizwe kaMengameli Jacob Zuma ebizoba kusasa.
Izolo uSomlomo wePhalamende uNkk Baleka Mbete umemezele ukuthi isihlehlisiwe inkulumo yesizwe, usuku lwayo luzomenyezelwa maduzane.
IRandi lisimame ngo-5 cents uma liqhathaniswa neDollar lase-United States lasuka kuR12.09 laya kuR12.04 ngabo-2 ntambama.
Isazi somnotho uSolwazi Bonke Dumisa sithe izimakethe zilindele ukubona okuzokwenzeka emuva komhlangano wesigungu esiphezulu se-ANC njengoba kungacaci ukuthi uMengameli Jacob Zuma wehla nini esikhundleni.
Uthe okuhle wukuthi uphethroli uzokwehla ngo-30 cents ilitha, udizili wehle ngo-17 cents no-19 cents namhlanje.
Uveze ukuthi iRandi belinguR12.30 ekuseni lisimame emuva kwesimemezelo sokuhlehliswa kwenkulumo kaMengameli.
Yize lisimeme kodwa alehlanga laya kuR11.00 ngenxa yokuthi abatshalizimali basalinde ukuzwa ukuthi uZuma wehla nini esikhundleni nokuthi kuzokwenzekani ezweni.
Uveze ukuthi iRandi lisenamandla uma liqhathaniswa noPondo wase-United Kingdom njengoba belikuR16.94 izolo ekuseni lisuka kuR16.97.
Izolo indodana kaZuma, uMnuz Edward Zuma, ithe akukho ezokuphawula ngokuhlehliswa kwenkulumo kaMengameli yesizwe ngoba yinto kahulumeni.
Ibuzwa ukuthi ngabe kukhona yini izingxoxo abake baba nazo bewumndeni ngokwehla esikhundleni kukaZuma, uwuhlabe inhlali, ngisho imiyalezo athunyelelwe yona ethinta lolu daba akayiphendulanga.