Owe-IFP ufe ngokudutshulwa nangamatshe
USHAQEKILE umndeni wakwaSithole eWeenen emuva kokufa kwelungu lawo elidutshulwe laphinde lakhandwa ngamatshe, uMnuz Sphiwe Mbho Sithole (38), obengumholi we-IFP.
USithole uke wasinda edutshulwa ngamadoda angaziwa emasontweni amabili edlule kodwa wagcina ebulewe ngeSonto.
Umfowabo kamufi, uMnuz Mthoko Sithole, uthe ukubulawa komfowabo kuhlangene nepolitiki ngoba bathole ukuthi kunohlu lwabaholi abathathu okuthiwa kufanele babulawe.
“Emasontweni amabili edlule umfowethu udutshuliwe kodwa wasinda. Sithole ukuthi kunabantu abafuna ukusoconga yena, mina noVilakazi naye ongumholi we-IFP. Inkinga wukuthi thina sikolunye uhlangothi kanti kukhona olunye olufuna ukuphatha. Ukubulawa kwakhe kuhlobene nombango wokuhola i-IFP eWeenen,” kusho uSithole.
Uthe umfowabo ushone kabuhlungu ngoba uqale wadutshulwa edlula ngasesikoleni eWeenen Combined ngesikhathi ebheka ukuthi amabhuleki emoto yakhe ayasebenza.
“Sithole inqwaba yamagobolondo ezinhlamvu zesibhamu esikhulu. Sibona ukuthi umfowethu ubalekile ngesikhathi edutshulwa kwasho ukuthi imoto yakhe idubuleke ithayi yase ingena esihlahleni. Uphumile wabaleka kanti amadoda abezomsoconga amlandela aqhubeka nokumdubula aze amkhanda ngamatshe,” kusho uSithole.
Uthe umfowabo ushiye emhlabeni izingoduso ezimbili nendodana yakhe eneminyaka eyisikhombisa.
Esitatimendeni esithunyelwe yi-IFP, uMnuz Blessed Gwala, uSihlalo wayo kuzwelonke, uthe bafuna kuvalwe izibhamu ezinkulu ngoba zibeka engcupheni impilo yabantu futhi isikhathi esiningi zisetshenziselwa ukusoconga osopolitiki nosomatekisi.
Uthe ilungu labo belidutshulwa ngama-AK47, R5, 308 nama-9mm.
“Uma izibhamu ezinkulu ezisetshenziswa ngamasosha empini zitholakala kalula kusho ukuthi umphakathi awuphephile. Sicela amaphoyisa aluphenyisise udaba lokubulawa kukaSithole ukuze kuboshwe ababulali. Sizwelana kakhulu nomndeni wakhe, abangani nabalandeli be-IFP eWeenen.
Mayelana nokuthi uSithole ubesatshiswa yizitha zepolitiki uGwala uthe: “Singajabula ukuthola lowo mbiko futhi uma kunohlu lwabantu abasatshiswayo kufanele siludlulisele emaphoyiseni ukuze kulekelelwane ukuthi kulandelwe lowo mkhondo,”
ULt Colonel Thulani Zwane wamaphoyisa KwaZuluNatal ukuqinisekisile ukudutshulwa kukaSithole wathi kuphenywa icala lokubulala. Bekungakaboshwa muntu okwamanje.