Kudlisa amupulangwe emicimbini
ANGENISILE amapulangwe asesetshenziswa ukuhlobisa kunoma iluphi uhlobo lomcimbi. Lama pulangwe abizwa ngama-pallet, abetholakala elahlwe ngisho ezaleni kodwa aseyinyama kwabasebhizinisini lokuhlobisa. Le ndlela yokuhlobisa ingenise kakhulu emicimbini yasengadini, lapho la mapulangwe enziwa khona amatafula.
UNksz Phindile Zondo, ongumnikazi weLolo Kiddies ehlobisela imicimbi, uthe lesi sitayela sokusebenzisa ama-pallet sibuyiswe ukuduma kwemicimbi yasengadini. Yize ibhizinisi likaNksz Zondo ligxile emicimbini yezingane, uthe bayayenza neminye yabadala okubalwa imicimbi yokuzalwa nama-baby shower.
“Ama-pallet siwasebenzisa kakhulu emicimbini ehambisana nama-picnic. La mapulangwe uma uthanda uyawapenda ukuze ahambisane nombala wosuku lomcimbi wakho. Uyakwazi nokuwasebenzisa enjalo engapendiwe, uwandlale izindwangu. Okumele kungasali kulolu hlobo lokuhlobisa, amacushion ngoba kuhlalwa kuwona phansi,” echaza.
Uthe ama-pallet bayawasebenzisa nasemicimbini yasendlini kodwa abukeka kahle kakhulu engadini. Uma kuwumcimbi ongaphakathi endlini, kumele kundlalwe ukhaphethi oluhlaza ukuze kubukeke sengathi utshani bengadi. Ebuzwa ngokusebenzisa ama-pallet emshadweni, uNksz Zondo uthe akujwayelekile.
“Yize ingekho into evimbayo ukuthi uwasebenzise emshadweni, angiboni ukuthi kukhona ongathanda izihambeli zomshado wakhe zihlale phansi. Kungaba yitafula elilodwa labathize ukunikeza lowo muzwa wokuba sengadini nento ehlukile,’’ kusho uNksz Zondo
Okunye okujwayele ukuhambisana nalolu hlobo lokuhlobisa ngama-pallet, yibhodi okubhalwa kulo ngoshoki amagama ezimenywa. Abanye babhala kulo ibhodi uhlobo lomcimbi, kuhlotshiswe nangoshoki abayimibala.
Kuthiwa ama-pallet ungawasebenzisa njengefenisha endlini, okubalulekile ukuveza ubungcweti bokuhlobisa. Abanye bawenza ama-head board embhedeni kanti ayenziwa netafula eliphakathi nendawo.
Kuleli tafula ungabeka ngaphezulu uqwembe oluyingilazi ukuze kubukeke kahle.
Ungawasebenzisa futhi ama-pallet ukuwenza osofa, ubeke ngaphezulu isipontshi sokulala, kubukeke njengecouch. Ungawasebenzisa ngisho ekamelweni lokulala, esikhundleni sokubeka i-base yombhede, ubeke umatilasi phezu kwawo.
Okubalulekile ngama-pallet ukuthi ungawambozi ngendwangu kodwa kumele kubonakele ukuthi yiwona njengoba esesitayeleni. Ungawashayelela nasodongeni bese ugaxa khona izithombe nezinye izinto zokuhlobisa.