Inselelo kubantu ngomdlavuza
KUFANELE wonke umuntu azibophezele ekulweni nokudlanga komdlavuza. Lokhu kushiwo yinhlangano eqwashisa ngomdlavuza, iCancer Association of South Africa (Cansa).
Njengoba kusanda kugujwa usuku lokuqwashisa ngomdlavuza emhlabeni wonke ngoFebhuwari 4, kukhuthazwa abantu ukuthi bazibophezele ekutheni babe neqhaza empini yokulwa nomdlavuza.
Isikhulu seCansa, uNkk Elize Joubert, sithe kulo nyaka bafuna wonke umuntu alekelele ekulweni nomdlavuza.
Uthe kubalulekile ukuthi libhekwe iqhaza elingabanjwa yizikole, imitholampilo, izinhlangano zomphakathi, othisha ekugqugquzeleni izingane ukuthi zinakekele impilo yazo.
Yize lolu suku seludlulile bazimisele ngokusebenzisa yonke le nyanga ukukhuthaza abantu ukuthi bagqugquzele izingane kakhulu ukuthi zazi ngomdlavuza nangezindlela zokuthi zizigcine zisesimeni esihle sempilo ukuze zizivikele ezifweni.
“Zonke izikole eNingizimu Afrika kufanele zihole umkhankaso wokugqugquzela izingane ukuthi zinakekele impilo yazo. Lokhu ngeke kusize kuphela ekulweni nokusabalala komdlavuza kodwa kuzosiza nasekulweni nezinye izifo ezidalwa yindlela esiphila ngayo ezaziwa ngama-non communicable diseases (NCDs),” kusho uNkk Joubert.
Balinganiselwa ku-8.2 million abantu ababulawa umdlavuza njalo ngonyaka emhlabeni wonke. Kulesi sibalo, bangu-4 million abantu abashona beneminyaka ephakathi kuka-30 kuya ku-69.
Kulindeleke ukuthi sinyuke isibalo sabantu abangenwa umdlavuza nabashona ngenxa yawo.
Kuthiwa eminyakeni engu-10 ezayo sizofinyelela ku-14 million isibalo sabantu abazoshona ngenxa yomdlavuza unyaka nonyaka.
Ngokwemininingwane yohlu lwabangenwa umdlavuza kuleli iNational Cancer Registry (NCR) bebelinganiselwa ku-55 286 abantu abangenwe umdlavuza eNingizimu Afrika ngo-2008. Kulesi sibalo, abangu-52% bekuyizingane nabantu besifazane. Ngo-2012 sinyuke safika ku-77 440 isibalo sabantu okubikwe ukuthi banomdlavuza eNingizimu Afrika. Izibalo zakamuva zikhombisa ukuthi siyanyuka isibalo sabantu abashona ngenxa yomdlavuza. Babengu-5.6% abantu abashona ngo-2006. Lesi sibalo sinyuke safinyelela ku-9% ngo-2015.
AbeCansa bathi inkinga enkulu ukuthi azibikwa ngendlela izigameko zabantu abangenwa umdlavuza nabagcina beshone ngenxa yawo kuleli.
Bathi wonke umuntu kufanele adle ngendlela, azivocavoce usuku nosuku.