Uhoxise ukucela ibheyili umsolwa kwelaseGlebe
UKHETHE ukuhoxisa isicelo sakhe sebheyili omunye wabasolwa ngokuba ngongqondongqondo ekubulaweni kwabantu ehostela laseMlaza, iGlebelands.
UMnuz Mondli “Thalente” Mthethwa (32) izolo utshele iNkantolo yeMantshi yaseThekwini ukuthi ucela ukuhoxisa isicelo sebheyili.
Lo msolwa akazange azibeke izizathu ezenza angafuni ukuliqula engaphandle leli cala.
Abanye abasolwa abayisithupha okubalwa nephoyisa uSergeant Bhekukwazi Mdweshu (37), oMnuz Vukani Mcobothi (25), Khayelihle Mbuthuma (32), Wonderboy Mhlope (37), Matlala Mdweshu Ntshangase (35) noMahliphiza Mkhize (28), bayaqhubeka nezicelo zabo zokuthi badedelwe ngebheyili.
IMantshi uFariedha Mohamed ilihlehlisele uMashi 26 kuya kuMashi 29 icala, ngoba ethi kudingeka izinsuku eziningi ukuba kufakwe izicelo zebheyili.
Abasolwa babekwe amacala awu-19, okubalwa kuwo awokubulala, itulo lokubulala, awokuzama ukubulala, elokutholakala nesibhamu nezinhlamvu okungekho emthethweni. Ukufakwa kwezicelo zebheyili bekubekelwe izinsuku ezintathu kusukela ngoMsombuluko kuze kube yinamuhla kodwa usuku lanamhlanje ngeke lusasetshenziswa njengoba icala selihlehlisiwe. Nayizolo enkantolo bekugcwele phama abantu abebesuka ehostela nezihlobo zabamangalelwa njengoba nangoMsombuluko bebefike ngobuningi.
Abasolwa bakhombisa ukuzikhululekela enkantolo njengoba nayizolo bebebingelela abantu abasenkantolo, bemoyizela. Abasolwa bazogcinwa esitokisini.