Luphenywa yi-Ipid olwabawu-9 abadutshulwe ngoMsombuluko
UPHIKO oluphenya izehlakalo zokubulawa kwabantu ngamaphoyisa i-Independent Police Investigative Directorate (Ipid) luphenya izigameko zokudutshulwa kwamadoda ayisishiyagalolunye adutshulwe eMpophomeni naseMariannhill, ngoMsombuluko.
UMnuz Moses Dlamini obhekelele ezokuxhumana kwiIpid ukuqinisekisile ukuthi bayaphenya kodwa wathi akukho okuningi abazokuveza okwamanje ngoba uma kube nesigameko sokudutshulwa komuntu ngamaphoyisa kufanele bangenelele beyi-Ipid.
Izolo, uKhomishana wamaphoyisa osabambile KwaZulu-Natal, uMajor General Bheki Langa, ubonge ukuthi alikho iphoyisa elisale enkundleni ngesikhathi edutshulwa yizigebengu ezisolwa ngokuqhumisa imishini yemali nokubamba inkunzi. “Amaphoyisa ethu kufanele avike izinhlamvu uma ezama ukubopha izigebengu. Kufanele ahlale elindele noma yini ngoba ngeke sivume ukusatshiswa yizigebengu. Sizoqhubeka nokuvikela abantu baKwaZuluNatal.”
NgoMsombuluko amaphoyisa akade elandela umkhondo wezigebengu ebezihlela ukuyobamba inkunzi eBulwer azame ukuzimisa kodwa zawadubula. Zibe sezibaleka ngomgwaqo onguthelawayeka uN3 zibheke ngaseThekwini zihamba ngezimoto ezintathu.
Amaphoyisa azilandelile athi uma ezimisa eMpophomeni zaqhubeka nokuwadubula kwashona eziyisithupha, esesikhombisa saphuthunyiswa esibhedlela.
Kutholwe izibhamu ezinkulu nezincane ezimotweni zalezi zigebengu kanti eyodwa kutholakale ukuthi beyebiwe enkabeni yeTheku.
Imoto yesithathu amaphoyisa azame ukuyimisa eMariannhill nakuyona izigebengu zawadubula kwase kushona ezintathu, esesine silimele saphuthunyiswa esibhedlela.
Njengamanje izigebengu ezimbili ziboshiwe futhi ziqashwe ngamaphoyisa ezibhedlela ezihlukene.
Kuvulwe idokodo ngokushona kwabasolwa kanti kuphenywa amacala okuzama ukubulala nawokutholakala nezibhamu ezingekho emthethweni.