UGould unengwa yisimo iSuperSport United ekuso
ASIMHLELI kahle isimo seSuperSport United umdlali wayo oyisithandwa sabalandeli, uMorgan Gould, osanda kuvuselela inkontileka yakhe naMatsatsantsa a Pitori.
UGould, osekucacile ukuthi uyoze awabeke ethala amakhokho edlalela iSuperSport, ukhathazekile ngesimo seqembu selokhu libuye kowamanqamu weCAF Confederation Cup nyakenye.
Akwethusi nokho ukuthi uGould avuselele le nkontileka kwazise ifomu yakhe yakamuva ikhomba ukuthi uya ngokuya uyavuthwa. Lo mdlali, ofike eqenjini esuka kwiJomo Cosmos eminyakeni engaphezulu kweyishumi edlule,uke wabuyiswa nakwiBafana Bafana nyakenye ngenxa yefomu abeyikhombisa kwiSuperSport.
Ngenxa yobuholi nokuzinikela kwakhe, iSuperSport ivikele isicoco sayo seNedbank Cup yahamba yaze yafika kowamanqamu weConfederation Cup lapho igcine ikhale khona ngaphansi kwiTP Mazembe yaseDemocratic Republic of Congo (DRC).
Nakubakunezikhathi lapho eqiwa khona yimidlalo ngenxa yezigwebo zamakhadi njengoba kwenzekile benqoba ngo 4-2 kwiBloemfontein Celtic kodwa ubuholi bukaGould esizana noClayton Daniles buyazibonakalela odongeni lweSuperSport.
“Simbi isimo ngoba kwesinye isikhathi uma ubheka kuyacaca ukuthi simenzela phansi umqeqeshi (u-Eric Tinkler) nabalandeli abahlale behamba nathi njalo. Asikho isidingo sokukhombana kepha kufanele sibhukule sonke. Iqembu libunjwe ngenqwaba yabadlali abayizethenjwa emazweni abo ngakhoke lesi simo kufanele kungabi yinkinga ukuphuma kusona,”kusho uGould.
“Kulo mdlalo abekhuluma ngemuva kwawo bebebanjwe yiPolokwane City sekusele amanenjana. Uqokwe njengomdlali ovelele kodwa ngendlela abecasuke ngayo ngenxa yokudedela iPolokwane ibabambe uvele wayikhahlela yayowa le kude indebeabenikwa yona ngokwenza kahle kwakhe osukwini. Ubekhuluma umbona ngisho ebusweni ukuthi unengekile futhi akakholwa wukuthi konke lokhu kwenzeka eqenjini lakhe.
NgeSonto bayaqala ukuvikela isicoco sabo seNedbank kodwa angase angabi khona njengoba uTinkler enike ikhefu abadlali bakhe abayisishiyagalolunye kuze kube uMsombuluko. Badlala ngeSonto ngo-3.30 ntambama neCeltic eDr Molemela. UTinkler akafihli ukuthi akanandaba nalo mqhudelwano kepha ubheke iligi.