I-Ajax isazomdlalisa uTendai Ndoro
ISHAYA phansi ngonyawo i-Ajax Cape Town ngodaba lukaTendai Ndoro osolwa ngokwephula imithetho yeFifa.
Ngeledlule iPremier Soccer League (PSL) ikhiphe isitatimende ebesiveza ukuthi iyaphikisana nesinqumo seDispute Resolution Chamber (DRC) sokuthi uNdoro aqhubeke nokudlala njengoba esolwa ngokudlalela amaqembu amathathu ehlukene ngesizini eyodwa okuphambene nemithetho yeFifa.
I-Independent Online enguzakwabo weSolezwe iveze ukuthi iSafa isiyitholile incwadi evela kwiPSL efuna lolu daba ludlulele kumehluleli ozimele. Ophethe ezomthetho kwiSafa uTebogo Motlanthe uthe sekushoda babhalele i-Urban Warriors bayazise ngalokhu.
NgoMgqibelo ngo8.15 ebusuku, i-Ajax izodudulana ne-Orlando Pirates emdlalweni we-Last 32 yeNedbank Cup e-Orlando Stadium, eSoweto, eGoli. Ngesonto eledlule ngesikhathi la maqembu edlala koweligi iPirates ifake isikhalo ngokudlaliswa kukaNdoro izeseka ngokuthi akanalo ilungelo lokuba yingxenye yomdlalo.
Umqeqeshi we-Ajax uMuhsin Ertugral ubophele uNdoro ngoba ethi uvunwa yisinqumo seDRC. Ngempelasonto uNdoro uphinde wabonakala ngesikhathi i-Ajax idlala nePolokwane City nayo efake isimangalo ngaphambi komdlalo.
Ethintwa yileli phephandaba ngodaba lukaNdoro,uMich d’Avry oyinhloko yabaqeqeshi kwi-Ajax, ugcizelele ukuthi basazombophela lo mdlali uma besibona isidingo.
“Angizimisele ngokuphawula ngodaba lukaNdoro kwabezindaba ngoba lusezandleni zabameli futhi kuningi okushiwo ngalo. Engingakutshela kona wukuthi njengoba edlalile emidlalweni eyedlule, nasemidlalweni ezayo sisazoqhubeka nokubomphela uma umqeqeshi embona efanelwe wukudlala. Uma kunokunye esibona kunesidingo sokuthi sazise umphakathi ngakho sizokhipha isitatimende,” kusho u-D’Avry.
Uma igcine ichithwa yicala i-Ajax evika izembe ingazithola isiphucwa amaphuzu eyawathola kudlala uNdoro kwiligi. Amaqembu adlale kuwona kule sizini ka-2017/18 yi-Orlando Pirates, Al Fasaily yase-Saudi Arabia ne-Ajax asedlala kuyona njengamanje.
Iningi labathandi bakanobhtshuzwayo ebelizitshela ukuthi i-Ajax izophumuza abadlali bayo abamqoka kwiNedbank ukuze bangaphazamiseki emkhankasweni wabo wokuvika izembe,baqambe beshilo ngoba leli qembu ngeke lisithambise isikimu.
“I-Nedbank Cup siyayihlonipha kakhulu. Ngeke silenze iphutha lokuyithatha kancane ngoba sithi sifuna ukugxila emidlalweni yeligi. Kulesi simo esikusona sidinga ukunqoba yonke imidlalo ephambi kwethuukuze sikhulise ukuzethemba. Ngeke silithambise iqembu lethu ngoba nakhu sithi noma singaphuma ukuze sizogxila emidlalweni yeligi. Ukushaya iqembu elisezingeni lePirates kuzokukhulisa kakhuluukuzethemba kwethu njengeqembu,”kusho u-D’Avry.
I-Ajax isanda kuthela iPirates ngehlazo lika 3-0 koweligi.
“Uma singashaya iPirates maningi amathuba okuthi singafinyelela kowandulela amanqamu walo mqhudelwano uma ubheka amaqembu indlela aqhathwe ngayo,” kusho u-D’Avry. Imidlalo 32: yeNedbank Cup Last
Namuhla: AmaZulu FC v Mthatha Bucks (King Zwelithini Stadium, 7.30pm); Ubuntu Cape Town v Polokwane City (Athlone Stadium, 7.30pm); Bidvest Wits v Cape Town City FC (Bidvest Stadium, 7.30pm)
NgoLwesihlanu: Cape Town All Stars v Mamelodi Sundowns (Athlone Stadium, 8pm) NgoMgqibelo: Swallows FC v Maritzburg United (Dobsonville Stadium, 3.30pm); Steenberg United v Orbit College (Parow Park, 3.30pm); Phiva Young Stars v Chippa United (Kabokweni Stadium, 3.30pm); Orlando Pirates v Ajax Cape Town (Orlando Stadium, 8.15pm): Super Eagles - Free State Stars (Goble Park, 8.15pm)
NgeSonto: Mariveni United v EC Bees (Old Peter Mokaba Stadium, 3.30pm); Kaizer Chiefs v Golden Arrows (FNB Stadium, 3.30pm); Happy Wanderers v Royal Eagles (Sugar Ray XuluStadium, 3.30pm; Celtic v SuperSport United (Dr Molemela Stadium, 3.30pm)