USerero udingiswe unomphelo yiSafa
USEDINGISWE ungunaphakade kwiBafana Bafana umdlali osezakhele igama elibi ngokuqhenyela iqembu lesizwe, uThulani “Cream” Serero, onekhono eliyisimanga.
Lezi zindaba ziqinisekiswe nguDenis Mumble oyisikhulu esiphezulu ngesikhathi ekhuluma naleli phephandaba ephesheya kwezilwandle e-Oman, e-Arab, izolo ntambama.
USerero ususe umsindo ngonyaka odlule ngesikhathi etshela umqeqeshi weBafana uStuart Baxter ukuthi kumele amnike isiqiniseko sokuthi uzomdlalisa emidlalweni emqoka yokuhlungela iNdebe yoMhlaba eseRussia ngoJuni ebidlalwa elakuleli neSenegal, ngaphambi kokuthi avume ukuya ekhempini.
USerero ubekwe ebhentshini ngesikhathi iBafana iqumba phansi iNigeria ngo 2-0 ekuhambeni emdlalweni wokuhlungela ukuzibekisela indawo kwi-Africa Cup of Nations (Afcon) eseCameroon ngonyaka ozayo.
Uphinde wagqunywa ebhentshini ngesikhathi iBafana ihlulwa yiCape Verde ekhaya nasekuhambeni emidlalweni yokuhlungela ukuzibekisela indawo kwiNdebe yoMhlaba. Kuphinde kwaba yinto efanayo iBafana ibhekene neBurkina Faso. Lokhu kumdinile uSerero kwazise ukubeke kwacaca ukuthi usekhathele wukufikela ubala eNingizimu Afrika.
“Bonke abadlali abadelela iqembu lesizwe bazodingiswa unomphelo. Ngeke sisayivumela le nto yabadlali ababukela phansi iqembu lesizwe. USerero akuyena kuphela esizomdingisa unomphelo kodwa nabanye abadlali abazoqhubeka nokuzithwala sizobenza into efanayo. Ubengaqali ukwenza lokhu akwenzile.
“Asikwazi ukuba nabadlali abazoqeqesha abaqeqeshi. Siyayiqonda ingcindezi ababhekene nayo phesheya kodwa lokho akusho ukuthi kumele bachizele iqembu lesizwe. Abanye abenza into efanayo ngeke sizihluphe ngokubaqokela kwelesizwe. Umqeqeshi akeneme ngendlela abadlali abaziphethe ngayo,” kusho uMumble.
USerero (27) ubesedlale imidlalo engu-38 kwiBafana washaya amagoli amabili. Uqale ukudlala kwelesizwe ngo-2011. Njengamanje ugijima kwiSBV Vitesse eyibamba esigabeni esikhulu eHolland.
“Angibi yingxenye yokuqokwa kweqembu kodwa umqeqeshi usibikele ngokungaphatheki kahle kwakhe ngendlela abadlali abenza ngayo uma bebizelwa kwiBafana. Ngiyaphinda ngiyasho futhi ukuthi labo abadedela iBafana ngeke siphinde sibabize kwelesizwe. Sixoxe isikhathi eside nomqeqeshi ngale ndaba. Akuyona into esivele savuka ekuseni sesithi siyayenza le engikhuluma ngayo. Ngeke sisayingena indaba yabadlali abafuna ukudlala kwelesizwe ngoba kuthanda bona,” kusho uMumble.
Indaba yabadlali abadelela iSafa ibisiphenduke insakavukela kwiBafana kwazise yaqala kudala kusadlala uBenni McCarthy nezinye izinkakha zeBafana.