‘Izwe libhekene nobunzima’
UMENGAMELI we-ANC uMnuz Cyril Ramaphosa uphumele obala wathi lesi yisikhathi esinzima esibhekene nezwe ngendaba kaMengameli Jacob Zuma.
URamaphosa, oyiPhini likaMengameli wezwe, uthe yena noZuma bayazi ukuthi abantu bafuna kuvalwe isahluko ngekusasa likaMsholozi ekuholeni izwe.
“Siqale izingxoxo ezakhayo noZuma mayelana nekusasa lakhe. Lezi zingxoxo zisinika ithuba lokuthi siphothule lolu daba ngokushesha kungabi nokwehlukana. Kuningi ukukhuluma okukhona negidigidi ngalolu daba,” kusho uRamaphosa.
Usho lokhu nje kudingeke kuhlehliswe inkulumo ebhekiswe esizweni namhlanje eKapa obekulindeleke ukuthi yethulwe nguZuma.
URamaphosa uthe uhlanganile noZuma ngoLwesibili ebusuku baxoxa wathi bafuna kusheshe kutholakale isixazululo.
“Ezinye zezinto esivumelene ngazo ngukuthi sihlehlise umhlangano wesigungu esiphezulu se-ANC ukuze sikwazi ukuphothula izingxoxo. Sizokwazi ukwazisa izwe uma sesifinyelele esivumelwaneni,” kuqhuba uRamaphosa.
Umhlangano wesigungu sikazwelonke obekumele uhlale izolo ntambama eKapa ubuzonquma ngekusasa likaZuma njengoba kuthiwa akafuni ukwehla esikhundleni.
URamaphosa uthe umsebenzi kahulumeni uyaqhubeka kanjalo nowePhalamende nakuba kuhlehliswe inkulumo ebhekiswe esizweni.
Usho lokhu nje izolo uRamaphosa noZuma bebesemhlanganweni wamakomiti eKhabhinethi eKapa njengoba umsebenzi uqhubeka.
USomlomo wePhalamende, uNkk Baleka Mbete, ekhuluma neSABC izlo ekuseni uthe lukhona usuku ngelizayo okungabanjwa ngayo le nkulumo ebhekiswe esizweni.
UNkk Mbete uthe ingathulwa ngoLwesine, kube nenkulumo mpikiswano ngayo ngoLwesihlanu bese umengameli aphendule ngoMsombuluko olandelayo uFebhuwari 19.
“Sikhona isikhathi ngesonto elizayo. Ngeke kuhlehliswe isabelo sezimali esihlelelwe uFebhuwari 21,”kusho uNkk Mbete.
Omunye wabasebenza esiShayamthetho sesifundazwe, ongagunyaziwe ukukhuluma nabezindaba, inkulumo kamengameli lapho esuke ehlahla khona indlela ngezinhlelo zonyaka yandulela eyokuthulwa kwesabelo sezimali.
“Isabelo sezimali sikangqongqoshe siyalandela ngemuva kwenkulumo yesizwe ngoba usuke esezosho ukuthi imali ethile uzoyifaka kuziphi izinhlelo ezisuke zimenyezelwe ngumengameli. Nasezifundazweni kuba njalo, kuqala inkulumo kaNdunankulu bese kulandela ekangqongqoshe wezimali, kulandele eyeminyango,” kusho lo msebenzi.
Okhulumela uZuma, uDkt Bongani Ngqulunga, uthe umengameli uqhubeka nomsebenzi wesizwe wathi ngoMgqibelo uzobe esemcimbini i-Ubuntu Awards eKapa eklomelisa abantu bakuleli abaphephezelisa phezulu ifulegi lakuleli kwamanye amazwe.