Ulaka lweNumsa kushona abasebenzi
INYUNYANA yabasebenza ngokusansimbi iNational Union of Metalworkers of South Africa (Numsa) ifuna ivalwe imayini iSibanye -Stillwater eseGauteng emuva kokushona kwabasebenzi ababili abadilikelwe wumgodi izolo.
UNkk Phakamile HlubiMajola obhekele ezokuxhumana kwiNumsa uthe kusobala ukuthi abeSibanye abakukhathalele ukuphepha kwabasebenzi ngoba nangesonto elidlule bekuvaleleke abasebenzi abangu-950 emayini yabo eseFree State emuva kokuphela kukagesi.
“Ngesonto elidlule besikhaliswa wukuvaleleka kwabasebenzi emayini yaseSibanye eseFree State abavaleleke emgodini amahora angaphezu kwangu-12. Ugesi wawungekho nama-generator engasebenzi. Namhlanje (izolo) kufe abasebenzi ababili emayini yabo eseGleharvie, eGauteng. Kuyathusa ukuthi abasebenzi bafela emigodini kodwa izikhulu zezimayini zihlangene kwiMining Indaba eseCape Town,” kusho uNkk Hlubi-Majola.
Uthe bafuna kwenziwe uphenyo olunzulu ngokushona kwalaba basebenzi.
“Sifuna kuphenywe kabanzi ngembangela yengozi ngoba kulo nyaka sekushone abasebenzi bezimayini abangaphezu kuka81. Kuyamangaza ukuthi izikhulu eziphezulu zezimayini akukho ezikushoyo ngezingozi ezenzeka ezimayini zakuleli. Sifuna kuqiniswe ezokuphepha,” kusho uNkk Hlubi-Majola.
UMnuz James Wellssted obhekele ezokuxhumana eSibanye Gold udlulise amazwi enduduzo emindenini yabashonelwe. Uthe kutakulwe izidumbu ezimbili zabasebenzi babo izolo ekuseni.
Uthe basola ukuthi abasebenzi bavaleleke emgodini emuva kokuzamazama komhlaba wathi kodwa wuphenyo oluzocacisa kahle konke.