‘Akubikwe ukushaywa kwezimoto yizigebengu ngamatshe’
IPHINI leMeya yeTheku, uNkk Fawzia Peer, ligqugquzele abashayeli bezimoto ukuthi bakubike emaphoyiseni ukushaywa kwezimoto ngamatshe emabhulohweni asemigwaqweni yalo masipala.
Uthe kunzima ukusho ukuthi ngabe zehlile yini izigameko zokushaywa kwezimoto ngamatshe ezibonakale zanda kulo nyaka ngenxa yokuthi abantu ababiki.
“Ngicela ukuthi abantu babikele amaphoyisa aseduze nabo uma izimoto zabo zijikijelwa ngamatshe. Le nkinga ayikakapheli futhi asazi ukuthi izophela nini ngoba abantu ababiki ngesikhathi kwenzeka,” kusho uNkk Peer.
Uthe basebenzisana namaphoyisa nezinye izinhlaka zezokuphepha ukugwema ukushaywa kwezimoto ngamatshe uma zidlula ngaphansi kwamabhuloho.
Ngonyaka odlule kwashona izingane ezimbili ngesikhathi imoto ezazihamba ngayo ijikijelwa ngetshe ku-N2 ngasoThongathi.
Abanye abashayeli basize amaphoyisa ukuwatshela ukuthi yiziphi izindawo ezinezigebengu ezijikijela abantu ngamatshe.
Ikhansela laku-ward 70 eChatsworth, uMnuz Tony Govender, udonse ngendlebe abantu ukuthi baqaphele uma beshayela ngaphansi kwamabhuloho ngoba izigilamkhuba ezijikijela izimoto ngamatshe azikakaboshwa.
Uthe kuyishwa ukuthi abanye abantu ababiki ngoba kufanele bazibike zonke izenzo zokujikijelwa kwezimoto ukuze amaphoyisa ezoqapha izindawo okwenzeka kuzo ubugebengu.
Uphethe ngokucela umphakathi ukuthi umpimpe abajikijela izimoto ngamatshe.