Badumele ngokuhlehla kweSona
BADUMELE abantu ngokuhlehliswa ngomzuzu wokugcina kwenkulumo ebhekiswe esizweni ebizwa ngeSona (State of the Nation Address) ebizokwethulwa nguMengameli Jacob Zuma namhlanje ntambama ePhalamende eKapa.
Abantu abakhulume neSolezwe bathi bebelindele ukuzwa ngendaba yemfundo yamahhala nendaba yezomnotho kanjalo nendaba yamathuba emisebenzi. UZuma bekulindeleke ukuthi ethule le nkulumo kodwa ngenxa yezimo ezithile kwadingeka ihlehliselwe usuku olungakaziwa.
UMnuz Sbonelo Nzimakwe wasePort Shepstone, uthe ubelindele kakhulu ukuzwa ngendaba yemfundo yamahhala kuleli.
UNzimakwe ongunobhala weSasco esifundeni iDurban South eThekwini, uthe le nkulumo akuyona eye-ANC kodwa eyomphakathi wonkana.
“Ngiyilungu le-ANC, bengilindele indaba yemfundo yamahhala ukuthi ibe seqhulwini kule nkulumo. Ukuhlehliswa kwayo kusho khona ukuthi zikhona izinkinga. Akukuhle ukuthi futhi inkulumo ihlehliswe ngoba kunesikhalo kwi-EFF, DA ngoba akuyona eyalawa maqembu le nkulumo kodwa eyomphakathi wonkana obulindele ukuzwa umkhombandlela,” kusho uNzimakwe.
UMnuz Lungelo Hlatshwayo waseMgungundlovu, uthe bekubalulekile ukuthi kulungiswe izinkinga ngaphambi kokuba kube nale nkulumo.
Uthe ubelindele ukuzwa eyemfundo yamahhala, eyokwakhiwa kwamathuba emisebenzi kanjalo nendaba yamakhono.
“Sifuna ukuzwa indaba yokuphuculwa komnotho njengoba i-ANC yanquma ukuthi kumele kube nezinguquko ezinqala kwezomnotho. Besilindele ukuzwa ukuthi uhulumeni uzobhekana kanjani nazo zonke lezi zinto kodwa manje sekumele silinde into esingayazi ukuthi izoba nini.”
UMnuz Zamokuhle Zungu waseHillcrest, uthe ukuhlehliswa kwale nkulumo kukhomba khona ukuthi kunezinxushunxushu kuKhongolose.
Uthe le nkulumo ibaluleke kakhulu ngoba yilapho bezwa khona ngezinhlelo zonyaka.
“Yinkulumo ebalulekile le ebhekiswe kuthina singumphakathi. Besidinga ukuyizwa.”
UNksz Sabeliwe Thwala waseHluhluwe, uthe badumele ngokuthi kuhlehliswe le nkulumo.
Uthe yilapho bebezozwa khona izinto eziningi ezithinta izwe kodwa manje abazokwazi ukuzizwa.
“Izinkinga azibekwe eceleni kuthulwe le nkulumo ngoba baningi abantu abangewona amalungu amaqembu ezepolitiki abebeyibhekile.
“Siyafuna ukuthi igcine ithuliwe,” kusho uNksz Thwala.
UNksz Thuli Gansa waseHarding uthe ayethulwe le nkulumo ngoba akuyona eye-ANC.
“Imfundo yamahhala yiyona nto ebengifuna ukuyizwa.
“Asethembe maduzane izothulwa.”