Bashaqekile ngemali exhase i-Eskom
IZINYUNYANA ezimele abasebenzi bezempilo sezizwakalise ukukhathazeka ngokutakulwa kwenkampani kagesi i-Eskom ngo-R5 billion yinkampani eyengamele isikhwama sempesheni yabasebenzi bakahulumeni, iPublic Investment Coporation (PIC).
Unobhala wenyunyana yabasebenzi bezempilo, iHealth and Other Service Personnel Trade Union of South Africa (Hospersa), uMnuz Noel Desfontaines, uthe bashaqekile ngokuxhaswa kwe-Eskom yinkampani eyengamele isikhwama sempesheni yabasebenzi bakahulumeni.
Lokhu kulandela isimemezelo esenziwe ekuqaleni kwaleli sonto sokuxhaswa kwe-Eskom yi-PIC eyengamele isikhwama sempesheni yabasebenzi, iGovernment Employees Pension Fund (GEPF).
UDesfontaines uthe iHospersa ikhathazekile ukuthi i-PIC iluvumile lolu hlelo lokutakula kwasekuqaleni.
Uthe abasebenzi bakahulumeni abaningi bathembele kule mali esesikhwameni uma beyeka umsebenzi.
“Kuwukunganaki ukuthi kungathathwa le mali isetshenziselwe ukutakula izinkampani zikahulumeni, ikakhulu lezo okusolakala ukuthi zihaqwe yinkohlakalo,” kusho uDesfontaines.
Ukhale ngokuthi akukhona okokuqala ukuthi kutakulwe izinkampani zikahulumeni ngoba zingenzi kahle.
Obambe kwesokuba ngunobhala jikelele wenyunyana yabahlengikazi i-Democratic Nursing Organisation of South Africa (DENOSA), uMnuz Cassim Lekhoathi uthe sibacasulile lesi sinqumo.
Uthe okubakhathaza kakhulu wukuthi ingxenye enkulu ka-R5 billion okutakulwa ngawo i-Eskom ivela emalini yempesheni yabahlengikazi.
Uthe ezinye zezikhalo zabasebenzi wukuthi yingxenyana nje yabo ekwazi ukuthenga imizi ngoba abaningi abakwazi ukukhokhela amabhondi. Noma kunjalo i-PIC ne-GEPF bakubona kulula ukuthi balahle imali betakula le nkampani.
Uthe akuseyona imfihlo ukuthi i-Eskom izifake yona ezinkingeni zezimali. Ngenxa yokuthi iningi labahlengikazi lisebenzela uhulumeni bakubona kukhathaza ukuthi i-PIC ingaphinde igembule ngemali yabasebenzi. Uveze ukuthi eminyakeni engemingaki edlule kucwile izigidi zemali yabasebenzi ngenxa yokuwa kwamasheya enkampani yakwaSteinhoff.
Uthe abayikholwa into eshiwo abe-PIC uma bethi baphenyisise kahle ngaphambi kokuthi bafake imali e-Eskom.