Kubavule amehlo ukuqeqeshwa eChina
BAHLOMULE ngamakhono nolwazi oluthe thuthu abafundi abenza izifundo zikagesi, eCoastal KZN Tvet College abebeyothekela ulwazi eChina.
Laba bafundi abangu-15 babuyele kuleli ngeSonto ngemuva kokuhlala unyaka khona befundiswa ngalo mkhakha.
Nakuba laba bafundi bahamba bengu-19 kodwa abane bagcina bebuyile bengaziphothulile izifundo zonyaka ngenxa yokugula.
Umphathi waleli kolishi, uMnuz Sibhanana Ndlovu uthe lolu hlelo lokuyisa abafundi eChina luthele izithelo njengoba bebuye nokuningi kuleli lizwe.
Uthe laba bafundi babuye namakhono abangeke bawaphucwe muntu njengoba iChina yaziwa ngamagalelo ayo emnothweni nasezintweni ezithinta imikhiqizo.
“Lolu hlelo silwenze ngokubambisana neMERSETA neChinese Culture Centre Internship. Kukhethwe abafundi abaneDiploma kwi-Eletrical Engineering ukuze bayofunda kabanzi eChina. Abafundi abenza kahle laba kwiMaths,” kusho uNdlovu.
Usho lokhu nje kunongabazane kwabanye abafundi abangawathandisisi amakolishi amakhono, bafuna ukuqhuba izifundo emanyuvesi. Uhulumeni uhlale enxusa abafundi ukuthi bakhethe amakolishi ukuze bathole amakhono.
“Laba bafundi bazokwazi ukuqasheka noma bazisebenze bona ngoba banolwazi oluthe thuthu. Kubalulekile ukuthi esikhathini esiphila kusona kube namakhono ezweni ngoba ayadingeka kakhulu,” kusho uNdlovu.
Omunye wabafundi obeseChina, uSizokuhle Sosibo uthe bafunde lukhulu eChina ngaphandle nje kwamakhono abawatholile. Uthe lolu hlelo lubasize kakhulu ngoba lubavule amehlo nempilo sebeyibuka ngenye indlela.
“Osekusele manje ngukuthi sithole umsebenzi ngoba kuningi esikufundile. Kukhona abebefundela lapho kwakhiwa khona amathelevishini awucwephe, isuswa phansi ize iphele. Besidla zona izinyoka namaxoxo kungelula kodwa sikwazile ukuqeda sabuya nezitifiketi,” kusho uSosibo.
Uthe amaChina awanandaba nesiNgisi, ubugebengu yinto engekho.
“Kuyabanda eChina abanye baze bagula kodwa sikwazile ukubekezela. Siqale safunda iSiMandarin (ulwini lwaseChina) safunda izinyanga eziyisithupha ekilasini sase siyosebenza ezinye izinyanga eziyisithupha.” UNdlovu uthe ziningi nezinye izinhlelo zokuthuthukisa amakhono kulesi sikhungo.
“Sinesikhungo sokuqeqesha abafundi abakhanda ama-fridge nama-aircon KwaMashu, sinesinye esisebenzisana kuso nezinkampani zamakhemikhali okunabafundi asebeqashiwe. Sinolunye uhlelo lokusebenzisana neReunion Island lokufundisa isiFrench kubafundi abenza umkhakha wezokuvakasha,” kusho uNdlovu.