Abangani basungule isikhungo sezempilo
KUFEZEKE iphupho kubangani abangodokotela abasungule indawo yokwelapha eMlaza.
UDkt Siphesihle Dlamini (27) noDkt Langelihle Ngubane (37) abangodokotela abalapha izifo ezehlukene benze into obekudala befisa ukuyenza besungula isikhungo sokwelapha eMlaza kwaP.
Labo dokotela bafunde esikhungweni semfundo ephakeme i-University of KwaZulu Natal, Nelson R Mandela School of Medicine.
Bobabili bachithe isikhathi esithile sempilo yabo eMlaza futhi bekuyiphupho labo ukuthi babuyele kuleli lokishi ngoba benethemba lokuthi bangenza ngcono impilo yabantu bakulona.
UDlamini uthe wayenza u-matric ngesikhathi eshonelwa unina kwathi enza unyaka wokugcina enyuvesi kwashona uyise. Uthe lezi zimo ezibuhlungu zamsiza ekutheni enze ngcono impilo yakhe.
UDlamini ozalelwe KwaMashu wase esuka eyohlala eMlaza esekhulile uphothule u-matric eSibonelo High, KwaMashu waphothula izifundo zakhe zobudokotela ngo-2013.
Uthe wayephothula uhlelo lokuqeqeshwa kodokotela olwaziwa nge-community service ngesikhathi etholana noNgubane okunguye owayemchushisa kulo mkhakha.
“Wangikhulisa emkhakheni wezempilo, saba abangani nophathina kwezamabhizinisi. Okubalulekile kakhulu ukuthi sinephupho nombono ofanayo yingakho sifuna ukuphumela ngaphandle emphakathini senze kube lula kubantu ukuthi bathole usizo lwezempilo olusezingeni,” kusho uDlamini.
UNgubane ongowokuzalwa eNquthu kodwa wakhulela eMlaza uthe ukukhula ebuka uyise ongumfundisi enza umsebenzi wokunakekela amalungu omphakathi kumenze wabona ukuthi kunzima kanjani kubantu, ikakhulu ezindaweni zasemakhaya ukuthi bathole usizo lwezempilo.
UNgubane uthe bakholwa ukuthi indawo abayivulile izobasiza ekutheni babambe iqhaza ekusondezeni izinhlelo zempilo kubantu.
“Ngikhule ngizitshela ukuthi ngiyoba unjiniyela kodwa sengihambe ngabona ukuthi ngangingeke ngilunge kulo mkhakha ngoba sengiwuthanda kakhulu umkhakha wezempilo,” kusho uNgubane.
Uchaze lo mkhakha njengoletha injabulo kalula njengoba ethe kwenza ube nobudlelwano neziguli futhi ukwazi nokuzisiza ngokomphefumulo.
Lesi sikhungo sihlinzeka izinhlelo ezahlukene zezempilo okubalwa kuzo ezabakhulelwe, abadinga ukusokwa nokunye.
Yize benesinye isikhungo esisePinetown, uDlamini uthe kube yinto ebaluleke kakhulu kubona ukuthi bathole ithuba lokuthi bakwazi ukuthi babe seMlaza.