Uzophuma esibhedlela ayoqula obebamba inkunzi
BAZOVELA maduze eNkantolo yeMantshi eMpangeni abasolwa ababili ababoshwe ngemuva kokudubulana namaphoyisa.
Okhulumela amaphoyisa KwaZulu-Natal, uLt Colonel Thulani Zwane, uthe lesi sigameko senzeke ngeSonto ngesikhathi amaphoyisa ophiko lwezinja eMpangeni elandela umkhondo ngokubanjwa inkunzi kwesitolo esisemgwaqweni uMaxwell, eMpangeni.
Uthe ngesikhathi amaphoyisa efika endaweni yesehlo abona abasolwa ababili bebaleka besuka esitolo.
UZwane uthe amaphoyisa ajaha abasolwa ngezinyawo, abasolwa bakhipha izibhamu badubula bebhekise emaphoyiseni.
Uthe amaphoyisa abe esephindisela ngezulu lezandla ezivikela kwalimala umsolwa oyedwa owadubuleka emzimbeni, omunye umsolwa waboshwa.
“Amaphoyisa athola izibhamu ezimbili ama-9mm, izinhlamvu ezingu-15 nesamba semali esingadalulwanga kubasolwa. Bobabili abasolwa baboshwa babekwa icala lokubamba inkunzi ibhizinisi, ukutholwa nezibhamu nezinhlamvu okungekho emthethweni,” kuchaza uZwane.
Uthe umsolwa owalimala usagadwe amaphoyisa esibhedlela kanti abasolwa bazovela maduze enkantolo.
Uthe izibhambu zombili zizoyiswa kohlolwa ukuze kubhekwe ukuthi azikaze yini zisetshenziswe ukwenza amanye amacala kuleli.
UKhomishana osabambile wamaphoyisa KwaZulu-Natal, uMajor General Bheki Langa, uncome amaphoyisa ngokuthola izibhamu nemali ebeyebiwe ngabasolwa.
Uthe amaphoyisa azokwenza isiqiniseko sokuthi ayaphenyisisa ukuze ayise idokodo elinabo bonke ubufakazi enkantolo ukuze abasolwa bashushiswe ngokufanele.