Bengiyofuna indlu okhahlelwe owe-ANC
OWESIFAZANE oshaywe yilungu le-ANC ngoMsombuluko wakhahleliswa okwebhola ngaphandle kwaseLuthuli House, uthi ubesendaweni engafanele ngesikhathi esibi.
UNkk Nkateko Makete (52) osevule icala, ushaywe namalungu eBlack First Land First (BLF) ngesikhathi behliswa evenini enkabeni yeGoli, uthe ubengayele ukuyobhikisha kule ndawo kodwa bebeyothula uhlu lwezikhalo kuNgqongqoshe wezokuHlaliswa kwaBantu, ukuBusa ngokuBambisana nezoMdabu eGauteng, uMnuz Paul Mashatile.
“Bengingazi ukuthi kunombhikisho mina ngoba bengiye laphayana ngiyofuna indlu ngikhale nangokuthi asinawo amanzi nogesi emijondolo yethu,” kusho uNkk Makete. Ekhuluma nephephandaba elinguzakwabo weSolezwe, iThe Star, uNkk Makete ubehleli nomyeni wakhe uMnuz Robert Makete (59) abanezingane ezine naye. Uveze ukuthi ngenxa yokuthi umjondolo wabo mncane, bahlala nezingane ezimbili eyodwa eneminyaka engu-11 neneminyaka engu-15. Baveze ukuthi abasebenzi, baziphilisa ngemali yesibonelelo sezingane zabo abayithola kuhulumeni. UNkk Makete ukuqinisekisile ukuthi uyilungu leBLF wathi yena nabantu base-Orange Farm Extension 10 bebeyozikhalela kuMashatile ngezidingo nezindlu.
“Imoto yethu ingene emgwaqweni ongafanele sahlaselwa ngamalungu e-ANC. Ngikhahlelwe kabuhlungu ngebhuzu, bengingakwazi nokuhamba ekuseni ngenxa yezinhlungu,” kusho uNkk Makete.
Umyeni wakhe naye oshayiwe uthe ugxumile esebona amalungu e-ANC kanti akazi ukuthi umkakhe uzosala eshaywa. Uthe umkakhe ufuna isinxephezelo sikaR20 000 kodwa amalungu eBLF athe kufanele athi ufuna kuboshwe indoda emshayile. UNkk Ntombifuthi Nkosi olimale iqakala uthe uthukile ngesikhathi behlaselwa ngoba bebengalwi. UMnuz Thapelo Molefe (24) naye oshayiwe uthe ufuna amaphoyisa akade ebukela ngesikhathi beshawa abekwe amacala.
Indoda eshaye uNkk Makete, uMnuz Thabiso Setona onguNobhala wegatsha le-ANC eGoli, ulale ebaliwe ngoMsombuluko.
UColonel Lungelo Dlamini wamaphoyisa eGauteng, uthe uSetona uyile enkantolo kodwa icala lakhe alingenanga ngenxa yokuthi kufanele kuqoqwe izitatimende kumgilwa, kwenziwe nolunye uphenyo.
Uthe bazophenya nokuthi amaphoyisa kaMasipala waseGoli nakahulumeni enzeni ukuvikela abantu. UNkk Gail Smith weKhomishini yamaLungelo Abantu usigxekile isigameko sokushaywa kowesifazane wathi amaphoyisa kufanele aphendule ngeqhaza lawo ekusigwemeni.