Sekuphele inyanga amanzi engekho eLovu
ingakafiki kithina.
“Okubuhlungu ukuthi siyawakhokhela amanzi. Angikaze ngizwe kuthiwa amanzi aphela inyanga yonke. Ngabe sesiphephela emifuleni manje nayo ishile ngenxa yesomiso.
“Asisakwazi ukuwasha ngoba asinawo amanzi. Kulezi zinsuku kuke kwaba nemvula sajabula sabeka izitsha kodwa lawo manzi asikwazi ukuwaphuza ngoba angcolile.”
Uthe umphakathi usuxabana wodwa kubangwa amanzi alethwa yimoto.
“Kuyilungelo lethu elikuMthethosisekelo ukuthi sithole amanzi ahlanzekile kodwa kuze kuphele isonto singawatholanga, sibe sinompompi emagcekeni. Kuyihlazo lokhu okwenzekayo, sicela umasipala wenze indlela yokuthi bonke abantu bawathole amanzi,” kusho uNksz Mkhungo.
UMnuz Ayanda Ndlovu, ikhansela lakule ndawo, uthe ukuntshontshwa kwamakhebula kagesi okuholele ekutheni injini edonsa amanzi edamini ingasebenzi.
“Onjiniyela bomkhandlu basebenza ngokuzikhandla ukulungisa lesi simo. Umphakathi siwuphakela amanzi ngamaloli, inkinga esinayo ukuthi umphakathi wakaFakazi usekugcineni. Iloli lamanzi kuyenzeka livinjwe ngabanye abantu lingakafiki kubo. Sike sazama ukuthi amaloli asebenzise omunye umgwaqo, ngeshwa akuhambeki kuwo ngoba kunemayini.”
Uthe onjiniyela bathembise ukuthi amanzi azobe esephuma kompompi izolo kodwa umphakathi uthe akakaphumi.
“Kule ndawo sinenkinga yokwebiwa kwamakhebuli emizini yabantu manje lo mkhuba sewudlulele ekutheni kunqanyulwe amakhebula kamasipala. Sihlele ukuthi le ndawo enamakhebuli uma isilungisiwe igadwe ngoba uma kungenziwanga, njalo kuzophela isonto esentshoshiwe futhi,” kusho uNdlovu.