EyeTheku ihambele eKapa ngenkinga yamanzi
IMEYA yoMkhandlu weTheku, uNkk Zandile Gumede, neNhloko yezaManzi kuleli dolobha Mnuz Ednick Msweli bahambele eCape Town ngenhloso yokuyocobelela ngolwazi leli dolobha ngezindlela zokulwa nesomiso sokuntuleka kwamanzi.
I-Cape Town ingaphansi kwengcindezi njengoba intula amanzi.
Ngendlela isimo esibi ngayo kunengwadla yokuthi kube neDay Zero, lapho amanzi engezophuma khona nhlobo kompompi.
UNkk Gumede noMsweli bebeyocobelela ngamasu okonga amanzi.
NeTheku like labhekana nenselelo yokuphela kwamanzi ngesikhathi kwehla amanzi emadamini amakhulu.
Okhulumela uNkk Gumede, uMnuz Mthunzi Gumede, uthe imeya ephinde ibe yiPhini likaMengameli weSalga ibinomhlangano wezinsuku ezimbili weSalga eCape Town, oqale ngoMsombuluko waphothulwa ngoLwesibili, kubhungwa ngezinto eziningi kubalwa nodaba lwesomiso.
UGumede uthe iTheku like labhekana nenselelo yokushoda kwamanzi kodwa lakwazi ukusilawula isimo ngokuqhamuka namasu amaningi.
“Umasipala uqale uhlelo lokonga amanzi, uwanciphisa nasebusuku, namanje lolo hlelo lusaqhubeka,” kusho uGumede. Uthe ngaphandle kokunciphisa amanzi, basungule ne-call centre ebhekelele ukuxazulula izinkinga ezibikwayo ezithinta amanzi.
UGumede uthe kulo mhlangano weSalga bekukhona izimeya zemikhandlu emikhulu kucotshelelwana ngolwazi kuphinde kubhungwe ngamasu okuhambisa intuthuko emphakathini.