Kunzima nokujabula ekamelweni ngenxa yendoda engasebenzi
EZOTHANDO
UMBUZO: Ngagana indoda engishiya ngeminyaka ewu22 ubudala kanti mina manje ngineminyaka ewu-34. Sesineminyaka emihlanu sishadile kodwa asitholi bantwana. Noma yena esola ukuthi imina onenkinga, angizange ngimtshele ukuthi ngake ngakhulelwa ingane yenye indoda engangithandana nayo kudala kodwa ngasikhipha isisu. Angikaze ngimtshele ngempilo yami yaphambilini ngoba angifuni angahlulele. Sekunzima ukuphumela obala manje emva kweminyaka engaka sishadile. Ungidlisa amaphilisi azongisiza ngikhulelwe ngokushesha, futhi usefaka nengcindezi yenhlobo yokudla okufanele ngiyidle ukungisiza. Angazi impela ukuthi ngenzenjani, ngoba ngiyazi mina ukuthi anginankinga nhlobo nje. Naye uyaphika ukuthi unenkinga kodwa akafuni ukuthi siye kodokotela. Senzenjani?
Mbali, Adams Mission IMPENDULO: Kunzima kakhulu ukungabatholi abantwana uma nishadile. Kodwa ngeke nazi ukuthi ubani ongabatholi ngaphandle kokuthi nibonane nodokotela. Nokukhulelwa kwakho phambilini akusho ukuthi ungaba nenkinga manje. Odokotela kuphela abangakuqinisekisa lokho. Ukubona udokotela kuzokwenza nazi ukuthi nibhekane nani khona nizokwazi ukulwa nento eniyaziyo nobabili. Umbuzo: Sineminyaka emine sashada nonkosikazi wami. Asizange sikhulume ngohlobo lomshado esizowushada ngaphambi komshado. Unkosikazi wami wangena kulo mshado enganalutho manje ayikho into angenayo. Okungiphatha kabi manje ukuthi usekhombise ukungathembeki kumina izikhathi eziningi kodwa ngiyasaba ukumshiya ngoba uzothola zonke izimali zami ayozidla nalabo bhuti athandana nabo. Ngifuna aphume aphele empilweni yami kodwa angazi kuzokwenzakalani ezimalini zami. Angifuni athole lutho. Igama ligodliwe,
eMondlo Impendulo:
Kubalulekile ukuvumelana ngaphambi kokuthi nishade ngenhlobo yomshado enifuna ukuba nawo. Ngeshwa uma ningakwenzi lokho kuthathwa ngokuthi nifuna lo mshado ohlanganisa amafa. Uma usamthanda unkosikazi wakho zamani ukubonana nabeluleki bezemishado ukuze banisize ukulungisa umshado wenu. Uma senivumelene ngokuthi anisathandi ukuba ndawonye kungcono ubonane nommeli wakho ukuze akuchushise kahle ngendlela ekumele uyithathe ukuze ungakhali ngaphansi ngalo mshado wenu. Umbuzo: Sesinonyaka sihlala ndawonye nesoka lami. Angiganile. Ngiyamthanda kakhulu kodwa ukungabinamsenzi kwakhe sekuqala ukudala inkinga ebudlelwaneni bethu. Ngazi ukuthi indoda kufanele ivuke ekuseni iyosebenza. Kanti yena cha uhlala endlini alinde mina ngibuye nesinkwa ntambama. Lokhu sekuqala ukungenelela ngisho ekamelweni. Ngiyahluleka ukuthatha indawo yami yokuba unkosikazi endodeni engabonisi izimpawu zokuba indoda ekhaya.
Khumbuzile, eMadadeni Impendulo: Awuchazanga noma indoda yakho iyawuzama umsebenzi kodwa iwona ongatholakali. Zama nawe ukumsiza lapho ongamsiza khona ukuze athole umsebenzi. Uma ungakaze ulukhulume lolu daba naye, yiso lesi isikhathi sokwenza njalo. Kubalulekile ukuthi azi ukuthi iyakukhathaza le ndlela okwenzeka ngayo. Njengendoda kumele avuke azithathe. Umbuzo: Sineminyaka ewu-20 sithandana nomuntu wami. Sewakhokha ngisho ilobolo waze wembesa. Kusele umshado omkhulu nje kuphela. Ngoba ngibona isimo sethu sezimali ngike ngamcela ukuthi siye kobhala enkantolo. Wakhombisa ukungasithokozeli lesi sinqumo sami kwaze kwagcina sekukhona ukungazwani phakathi kwethu. Ngibona ukuthi yena uzitshela ukuthi mina ngibona ukuthi akanayo imali yokungishada kanti mina bengizama ukumsiza. Manje okungixakayo ukuthi akasayiphathi nhlobo manje eyokushada. Asisesihle ngempela isimo phakathi kwethu kodwa manje akekho ofuna ukuphumela obala ngekusasa lethu. Ngenzenjani? Sengicabanga ngisho nokuphumela ngaphandle ngoba angiyazi into engisayihlalele kuleli khaya. Igama ligodliwe, eThekwini Impendulo: Izinto zoniwa wumlomo ziphinde zilungiswe nguwo. Kungenzeka ngempela ukuthi isoka lakho alikuqondanga kahle ukuthi uchazani ngendaba yokushada enkantolo. Okungenzeka ukuthi naye uzitshela ukuthi ukuyoshada enkantolo kuzokwehlisa isithunzi sakhe njengendoda. Umshado omkhulu ningabuye niwenze uma iphakethe livuma. Yixoxeni le ndaba ningahlukaniswa yinto ebingaxazululeka. Facebook: Mo & Phindi Instagram: Mo & Phindi Email: info@moandphindi. com