U-CR akakhulume ngezinsika zobumbano
MHLELI: Baningi abanenkolelo yokuthi uMnuz Cyril Ramaphosa unguMesiya ozoletha olukhulu uguquko, alamulele isikoqokoqo sesizwe noKhongolose emaseleni asezichanasela ezweni. Baningi okuthe sekuvela amaqiniso ngobumbuka bukaMnuz Jacob Zuma babanjengoThomas owakholwa ngokuthinta amanxeba eNdodana kaSomandla. Masingalenzi lelo phutha esalenza kusukela ngo-2005-2007-2012.
Bengikhona uRamaphosa evakashela umuzi waseGroutville lapho kunedlinza lenkosi Albert John Mvumbi Luthuli. Njengase Monti ukhulume ngobumbano kodwa wangasho ukuthi yiluphi, lunjani noma yiziphi izinsika zobumbano okufanele akhulume ngazo. Ake ngizibeke izinsika okufanele akhulume ngazo.
Insika yokuqala eyokubambisana kwamalungu kaKhongolose ekugudluzeni amasosha akhokhelwayo (mercenary) uMnuz Nelson Mandela akhuluma ngawo engqungqutheleni eyayiseMahikeng ngo-1997.
Njengoba kungunyaka wekhulu kwazalwa uMandela kufanele uMengameli Ramaphosa njalo uma ekhuluma noma acaphune lo mbiko kaMadiba. URamaphosa ungomunye owagqashula uqhoqhoqho woFezela, namuhla amaqabane ayethembekile aseyeba nawo. Amanye asekela uRamaphosa akamsulwa. Akasho ukuthi naye wenza iphutha ngokuhlakazwa koFezela. Akabuyisele esikhundleni uMnuz Anwar Dramat.
Enye insika wukufaka “ungqi” ekuhlaselweni kwamaJaji. Sibonile uMokotedi Mpshe eklonyeliswa ngokuchitha amacala kaZuma, bamkhuphulela isikhundla sokuba yiJaji. USihlalo kazwelonke obenguNobhala Jikelele, uMnuz Gwede Mantashe, wayehamba phambili kuhlaselwa amaJaji. Okuhle wukuthi usejikile, noSawule wayebulala izimvu zeNgonyama yeZulu kodwa mhla esikazwe ngombani, wakhonza le Ngonyama washintsha igama waba nguPawule.
Insika yesithathu, oMnuz John Block, Dan Mofokeng, Alpha Shelembe nabanye akekho kubona okufanele aphelekezelwe uma eseya enkantolo. Insika yesine wukuvuselela imikhankaso enjengalena “Batho Pele, Masakhane, Letsema, ukuvuselela izimilo”.Insika yesihlanu yimfundo. Eyesithupha wukuzimela kwabashushisi. Akabuyiselwe uMnuz Mxolisi Nxasana noma kubuyiswe uMnuz Vusi Pikoli noma kuthathwe uNksz Thuli Madonsela. Insika yesikhombisa eyokuthembeka kubaholi nasekuphatheni izimali bese efaka laba: uMnuz Pravin Gordhan njengoNgqongqoshe wamaBhizinisi kaHulumeni bese enza oyedwa walaba uNgqongqoshe wezimali, Tito Mboweni, Jabu Moleketi noma uGill Marcus.
Insika yesishiyagalombili wukuqoka abakhuthele. Ukugcina labo ngqongqoshe kuyomlahlekisela isithunzi nokwethembeka: Dave Van Rooyen, Faith Muthambi, Bongani Bongo, Mbalula. Siyojabula ngoRamaphosa ozobe ehola imigubho kaMandela noMam Albertinah Sisulu. Siyanda Mhlongo KWADUKUZA