Asiphephile ezitimeleni amaphara asibamba inkunzi ehlomile
Thabani Khumalo EMLAZA MHLELI: Ngikhathezekile ngokungabi khona kokuphepha ezitimeleni zantambama ikakhulukazi zaseSouth Coast.
Kukhona osikhotheni namaphara asibamba inkunzi, asiphuce izikhwama esikhombe ngommese.
Akekho nozamayo ukukhuza ngoba esabela impilo yakhe naye. Bangena bakubambe inkunzi kugwcele abesilisa kungabi ndaba yalutho. Wona la maphara aphinde alale khona eziteshini. Abantu bayagwazwa ezitimeleni, siyakhuthuzwa kube bekhona onogada bezitimela laba abasebenza kwaProtection.
Noma usubanjiwe laba bamathikithi abanandaba nokuthi isikhwama asikho noma sihambe nani kodwa bona bafuna ithikithi lesitimela, ikakhulukazi abaseSphingo Station.
Bakhona ezitimeleni zasemini nasekuseni behamba nalaba ababheka amathikithi noma eziteshini kodwa abekho ezitimeleni zantambama.
Umbuzo wami lapho uthi kanti bazokwenzani labo nogada uma bengeke babe khona kuzo zonke izitimela ukuphephisa impilo yabagibeli bezitimela na?
Akekho ongazi ukuth izitimela azihambi ngesikhathi nsuku zonke ngisho nje ngangiyongena u-10 ebusuku emsebenzini ngilinde esika-6.30 kodwa safika ngo-8.30 ebusuku lapho engazibonela ngawami owesifazane owaphucwa isikhwama ngibhekile.
Aseyabiza kabi amathikithi. Uma ushaya elibuyayo nguR17.
Yimali enkulu kabi leyo. Sicela ukuphepha ezitimeleni ngoba thina siphila ngazo lapha. Akuphephile neze siyesaba kakhulu.
AbakwaMetrorail noPrasa kumele benze imizamo ngalokhu njengoba nathi sibakhokhela ngokwefanele. Sthabile Dlamini UMGABABA