Ubonga uthando lukayise oweMbokodo obuye ahlomise intsha
UKUKHULISWA ngubaba kuphela, umama engekho kumenze waluqonda kangcono uthando lukababa.
UThandeka ‘Shanda Pha’ Makhoba (27) owethula uhlelo olwakhayo kwiMbokodo FM olungena njalo ngoMgqibelo, iThe Weekend Pleasure: Siyakhiwa, uthe ufunde okuningi njengoba bekunguyena kuphela intombazane phakathi kwesiqhoqho sabafana bakubo.
“Abazange bangibandlulule ngokuthi ngiwumuntu wesifazane. Bebengiyeka ngidlale nabo futhi ngigqoke nezingubo ebekungezabo kodwa bebengakhohlwa ukuthi ngingumuntu wesifazane okumele aphiwe uthando nokunakwa. Ukukhula nabo kungenze ngafunda ukubaluleka kothando kumuntu wesilisa. Ubaba ubengipha uthando lokuba ubaba futhi ubazi ukuthi kumele lugcine kuphi. Abafowethu nabo bebenza okufanayo. Sengikhulile lokhu kungisizile ukuthi ngikwazi ukuhlukanisa kahle.”
Ngokubona kwakhe ezinye izinkinga zothando ezikhona zidalwa ukungakwazi ukuhlukanisa ukuthi umuntu kumele akuthande kugcine kuphi.
UThandeka unenhlangano ethuthukisa abantu abasha ngolwazi, iThe Capenters Union. Uthe uke aqaphele ukuthi igama lothando njengamanje alusenaso isisindo futhi abanye abantu abakwazi ukuthi uthando luhlukene kaningi.
“Cishe kuzo zonke izigaba zothando kuyenzeka ukuthi kusetshenziswe igama lothando ukufeza izinhloso ezingalungile. Lokhu kwenziwa nangabantu abathembekile abangabafundisi. Kwabathandanayo nakhona ziningi izinto ezingingelona uthando ezenziwa ngabantu bethi bazenza ngoba bebathanda labo ababahlukumezayo.”
NgoMgqibelo ozayo uThandeka uzobe enesithangami sokucobelelana ngezinto ezithinta uthando, KwaDukuza asibiza ngokuthi iHeart Alive. Lesi sithangami sizobe sinezikhulumi ezizobe ziluleka ngothando njengoba kuyinyanga yalo nje.
“Izinhlelo ezenziwa yinhlangan yami zinikeza abantu abasha ulwazi ukuze kuphenduleke le mibuzo abathi uma beyibuza emakhaya kuthiwe, nathi asibuzanga. Ngibuye ngisize labo bantu abasha abangenabo abazali abangabuza kubo leyo mibuzo. Nakwezothando ziningi izinto abantu abasha abathi uma bezibuza bangazitholi izimpendulo Kulesi sithangami bazokwazi ukubuza kongoti bezothando, ngokukhululeka baphinde bafunde ezinye izinto okungenzeka ukuthi bebengaziqondi.”
Uthe ukusungula kwakhe inhlangano ehlomisa abantu abasha kungoba wayefisa ukushiya ifa abangeke baliphucwe muntu. “Ngikholwa ukuthi ulwazi luyisikhali nesipho ongeke usiphucwe muntu. Uma uthole ulwazi ucebe wehlula umuntu onemali ngoba ngolwazi, ungakwazi ukuzenzela imali,” kusho uThandeka.