I-BLSA ikuncomile ukuqokwa kwezikhulu ezimbili ze-Investec
IBUSINESS Leadership South Africa (BLSA) ikushayele ihlombe ukuqokwa kukaMnuz Fani Titi noMnuz Hendrik du Toit ukuba babe yizikhulu eziphezulu zenkampani yezimali i-Investec kusukela ngo-Okthoba.
Izolo isikhulu esiphezulu sase-Investec esiphinde sibe yilungu leBLSA, uMnuz Stephen Koseff, simemezele ukuthi sizozibeka phansi izintambo ngo-Okthoba.
NoMqondisi wale nkampani uMnuz Bernard Kantor uzokwehla ukuze kungene abaholi abasha.
Esitatimendeni kuvele ukuthi uKantor noKoseff bazoqhubeka nokuba ngamaNon Executive Directors.
Kulindeleke ukuthi noMnuz Glynn Burger, oyiGroup Risk and Finance Director athathe umhlalaphansi ngoMashi wonyaka ozayo naye.
UTiti noDu Toit bazoba yizikhulu eziphezulu ezibambisene kanti bazoqala ukuncela ulwazi lomsebenzi wabo omusha kusukela ngo-Ephreli 1 walo nyaka.
Abakwa-Investec baveze ukuthi uTiti ubengomunye wabaqondisi bale nkampani kusukela ngo-2004, waba nguSihlalo ngo-2011.
UDu Toit kuvela ukuthi wayeyisikhulu esiphezulu se-Investec Asset Management futhi engumqondisi kusukela ngoDisemba ka-2010.
UNkk Kim McFarland oyisikhulu esiphezulu esibhekelele ukusebenza nezezimali e-Investec, kuthiwe usezoba yiGroup Finance Director kusukela ngoEphreli 1 wonyaka ozayo.
Isikhulu esiphezulu seBLSA, uMnuz Bonang Mohale, uthe bayajabula ngokuqokwa kukaTiti futhi kukhombisa ngokusobala ukuthi uma abantu besebenzisana izinkampani zingasimama.
“Sifuna ukubona uguquko ezinkampanini ezinkulu, sifuna ukubona abaholi abamnyama behlonyishwa ngamathalente abawadingayo ukuphatha lezi zinkampani. Selokhu sakumemezela lokhu siyazibona izinkampani ezinkulu zishintsha zifaka zonke izinhlanga ebuholini obuphezulu,” kusho uMohale.
Uthe abafuni abantu abamnyama babe yisibalo nje ebuholini obuphezulu bezinkampani kodwa bafuna ukubabona beziphethe ngoba banawo amakhono.
Uthe bayabuthemba ubuholi bukaTiti noDu Doit futhi abangabazi ukuthi bazoqhubeka nokusimamisa i-Investec.
Ugqugquzele ezinye izinkampani ukuthi zibukele kwi-Investec zilethe uguquko ebuholini obuphezulu.