Kuzohamba kahle emabhizinisini abancane
IZIHLATHI zizovakashela izindlebe kosomabhizinisi abancane njengoba inkampani ebhekele ukufukulwa kwabo, iBusiness Partners Limited (Business/ Partners) iveze ukuthi lo nyaka uza noshintsho kwezomnotho.
Esitatimendeni uMnuz Ben Bierman, onguMqondisi eBusiness/Partners uthe osomabhizinisi abancane bazoba nethuba lokukhula kulo nyaka ngenxa yokuthi uhulumeni uzoshintsha ukuphathwa kwezimali.
UBeirman uthe njengoba sekunobuholi obusha enhlanganweni ebusayo sebuqalile ukuveza ukuthi umnotho bufuna ukuwukhulisa ngokuthi uhulumeni abophe izifociya.
“Ubuholi obusha bugqugquzele ukuthi imali iphathwe kahle ezinkampanini zikahulumeni. Buphinde bacacisa ukuthi umsebenzi kufanele wenziwe yizinkampani zakuleli ukuze yonke imali isebenze ngaphakathi. Uma kuthiwa imali ayisebenze ngaphakathi kusho ukuthi makuqokwe izinkampani ezincane ukuze zenze umsebenzi ezinkampanini zikahulumeni,” kusho uBierman.
Uthe imali yesabelomali sikahulumeni ishoda ngo-4.2% okusho ukuthi abantu kufanele bakhokhe intela eningi futhi nohulumeni eze nezinye izindlela zokwenza imali.
Ukufakwa kobuholi obusha e-Eskom kuzoza namathuba kosomabhizinisi abancane ngoba bafuna ukwehlisa izikweletu zenkampani.
Uthe unethemba lokuthi osomabhizinisi abancane bazokhula kulo nyaka ngenxa yokuthi ucwaningo luveza ukuthi umnotho ungase ukhule ngo-1.4%.
“Osomabhizinisi bazohlomula nasemathubeni ezomnotho angase avele eZimbabwe. Umnotho waseNingizimu Afrika nawo uzokhula ngoba abantu bakhona abahlala kuleli bangase babuyele emakhaya,” kusho uBierman.
Uthe osomabhizinisi abancane uma befaka intengo empahleni nasemsebenzini abawenzayo kufanele bakhumbule ukuthi iValue Added Tax (VAT) izonyuka.
“Osomabhizinisi kufanele baqhubeke nokuphatha kahle imali ukuze amabhizinisi abo athuthuke. Abadayisa ukudla okuphekiwe bangase bathwale kanzima ngenxa yokuthi abantu abanayo imali,” kusho uBierman.
Ugqugquzele abezolimo ukuthi bajoyine izinhlangano zosomabhizinisi ukuze zibakhulumele uma kunezingqinamba ezithile.
“Njengoba sesingekho isomiso abantu abakwezolimo kuzobahambela kahle. Abazothwala kanzima yilabo abaseWestern Cape lapho isomiso siqhubeka khona. Okumnandi wukuthi kuzohlomula abalimi abakhulu nabancane,” kusho uBierman.